Непалда Эверестке жақын Пхериче ауданында қону кезінде екі тікұшақ соқтығысып, бір адам қаза тапты, тағы екеуі жарақат алды. Оқиға жергілікті уақытпен 3 қарашада сағат 08:12 шамасында болды, деп хабарлайды infohub.kz сайты.
Қаза тапқан адам — Fishtail Air компаниясының тікұшағында болған Үндістан азаматы Васант Кумар Баларамуду. Осы машинаның ұшқышы мен үнді текті Жаңа Зеландия азаматы жарақат алды. Зардап шеккендерді Катманду ауруханасына жеткізді.
Непал азаматтық авиация басқармасының дерегінше, AS350 үлгісіндегі екі тікұшақ соқтығысқан. Әлеуметтік желілерде оқиғаның бейнежазбасы пайда болды: кадрларда жердегі қызметкерлердің ескертулеріне қарамастан бір машинаның төмендеп, қарсы жақтан қонуға келе жатқан тікұшақпен соқтығысқаны көрінеді. Қалақтар жолаушылар салонының терезелерін жанап өткен. Соқтығыс сәтінде екі машина да жерден екі-үш метр биіктікте болған.
Оқиғаның нақты себебі әзірге белгісіз. Непал азаматтық авиация басқармасының басшысы Мукеш Данголь ұшқыштар бірін бірі дұрыс түсінбеуі мүмкін деп болжады.
«Алдын ала мәліметтер ұшқыштар арасындағы түсініспеушілікті көрсетеді, өйткені бұл аудан Лукла әуежайының диспетчерлік мұнарасының қамту аймағынан тыс, сондықтан ұшқыштар бір-бірімен байланысты өздері ұстауға мәжбүр», — деді ол.
Оқиға тікұшақ компаниялары мен жергілікті тұрғындар арасында Эверест үстінен ұшу санының көптігіне байланысты дау жүріп жатқан кезде болды. Тұрғындар әуе экскурсиялары Сагарматха ұлттық паркінің экожүйесіне зиян келтіріп, жергілікті халыққа кедергі жасайды деп санайды. 1966 жылдан бері Непалда тікұшақтар қатысқан кемінде 22 апат адам өлімімен аяқталғаны атап өтіледі.