نەپالداعى جويقىن سۋ تاسقىنىنان قازا تاپقاندار سانى 157-گە جەتتى، تاعى ءۇش ادام قىتايدىڭ تيبەت ايماعىندا قازا تاپتى، دەپ حابارلايدى infohub.kz.
اپات 26 تامىزدا نەپال مەن جۇڭگو شەكاراسىنا جاقىن ورنالاسقان راسۋۆا تاۋلى اۋدانىندا بولدى. سۋ، لاي جانە تاس اعىندارى تۇرعىن ۇيلەردى، جولداردى، كوپىرلەردى، اۆتوكولىكتەردى جانە گيدروەنەرگەتيكا نىساندارىن شايىپ كەتتى. جاريالانعان بەينەجازبالاردا شەكارا بەكەتىندەگى ادامداردىڭ اعىنمەن اعىپ كەتكەنى كورىنەدى.
نەپال تۋريزم مينيسترلىگىنىڭ سوڭعى دەرەكتەرى بويىنشا، 400-دەن استام تۋريست حابار-وشارسىز كەتكەن، ونىڭ ىشىندە 340-قا جۋىعى شەتەل ازاماتتارى. نەپال تۋريزم كەڭەسىنىڭ وكىلى سۋنيل شارمانىڭ ايتۋىنشا، حابار-وشارسىز كەتكەندەردىڭ اراسىندا: قاجىلىق جاساپ جۇرگەن ءۇندىستاننىڭ 133 ازاماتى، اقش-تىڭ 47 ازاماتى، اۆستراليانىڭ 34 ازاماتى، ۇلىبريتانيانىڭ 33 ازاماتى جانە كانادانىڭ 24 ازاماتى بار. سونداي-اق گەرمانيا، يسپانيا، نيدەرلاند، مالايزيا، وڭتۇستىك افريكا جانە باسقا ەلدەردىڭ تۋريستەرى ىزدەستىرىلۋدە. وڭتۇستىك كورەيا گيدروەلەكتروستانسيا قۇرىلىسىندا جۇمىس ىستەگەن سەگىز ازاماتىنىڭ حابار-وشارسىز كەتكەنىن حابارلادى.
تيبەت اۋماعىندا كەمىندە ءۇش ادام قازا تاپتى، تاعى 265 ادام حابار-وشارسىز كەتتى. گيرونگ شەكارا بەكەتىنە كوشكىن ءجۇرىپ، جولدار، بايلانىس جانە ەلەكتر جەلىلەرى زاقىمداندى.
بولجام بويىنشا، سۋ تاسقىنى مۇزدىقتىڭ ءبىر بولىگى قۇلاعاننان كەيىن بولدى، ول تاستارمەن جانە توپىراقپەن بىرگە اڭعارعا قۇلاپ، قۋاتتى سۋ مەن لاي اعىنىن تۋدىردى. ساراپشىلاردىڭ دەرەگىنشە، مۇزدىق شامامەن 5،2 مىڭ مەتر بيىكتىكتە ءبولىنىپ، 1،2 مىڭ مەتر تومەن قۇلاعان. اعىن لحەندە-كحولا، بحوتە-كوشي جانە تريشۋلي وزەندەرىمەن ءوتتى. ءبىر ۋچاسكەدە سۋ دەڭگەيى جارتى ساعات ىشىندە توعىز مەترگە كوتەرىلدى. اپاتتان ءسال بۇرىن بۇل ايماقتا ماگنيتۋداسى 4،4 جەر سىلكىنىسى بولدى، ول مۇزدىقتىڭ قۇلاۋىنا سەبەپ بولۋى مۇمكىن، ءبىراق بۇل نۇسقا ازىرگە راستالعان جوق.
قۇتقارۋشىلار حابار-وشارسىز كەتكەندەردى ىزدەۋدى جالعاستىرۋدا، الايدا جۇمىستى قيراعان جولدار، لاي جانە سۋ دەڭگەيىنىڭ جوعارى بولۋى قيىنداتىپ وتىر. تىكۇشاقتار ازىرگە كەيبىر زارداپ شەككەن اۋداندارعا قونا المايدى.
بۇعان دەيىن قازاقستان سىرتقى ىستەر مينيسترلىگى زارداپ شەككەندەر مەن حابار-وشارسىز كەتكەندەر اراسىندا قازاقستاندىقتار جوق ەكەنىن مالىمدەگەن بولاتىن. ءسىم رەسمي وكىلى جانبولات ۇسەنوۆ جاعداي مينيسترلىكتىڭ باقىلاۋىندا ەكەنىن اتاپ ءوتتى.