نەپالدا مەكتەپ ديرەكتورى 900 وقۋشىنى ءقاۋىپتى تاسقىننان امان الىپ قالدى. اپات سالدارىنان قازا تاپقاندار سانى 781-گە جەتىپ، مىڭداعان ادام حابارسىز كەتكەن. بۇل تۋرالى infohub.kz حابارلادى.
نۋۆاكوت اۋدانىنداعى تريبحۋۆان تريشۋلي ورتا مەكتەبىنىڭ ديرەكتورى رادجەندرا داۆادي سۋ تاسقىنى تۋرالى ەسكەرتۋ العان سوڭ ساباقتى توقتاتىپ، وقۋشىلاردى بيىك جەرگە كوشىرۋگە شەشىم قابىلدادى. ول بىرنەشە مينۋت ىشىندە ءتورت ەسكەرتۋ العان، ونىڭ ىشىندە تىكەلەي جوعارعى اعىستا ورنالاسقان بەتراۆاتي قالاشىعىنان دا ەسكەرتۋ بولعان.
داۆادي دەرەۋ ارەكەت ەتۋ كەرەكتىگىن ايتتى. «مەن ەندى كىدىرۋگە بولمايتىنىن ءتۇسىندىم»، — دەدى ول BBC-گە. «تاسقىن كەلمەسە دە، بۇل ءبىر كۇندىك ساباق قانا ەدى». ەۆاكۋاسيا كەزىندە ول وزەننەن شامامەن 100 مەتر جەردەگى جاتاقحانا عيماراتىنىڭ سۋ استىندا قالعانىن كوردى.
«ەگەر ءبىز شەشىمدى 10 مينۋت كەش قابىلداعاندا، ءبىز — مەن جانە وقۋشىلار — بۇگىن سىزدەرمەن سويلەسە الماس ەدىك»، — دەدى ول. 16 جاسار وقۋشى يۋنيشا جۋرناليستەرگە: «مەن دوستارىممەن بىرگە نەبارى 10 سەكۋندقا عانا ۇلگەرىپ قۇتىلدىق»، — دەدى. ول بالالاردىڭ سۋ مەن قوقىس قالاشىقتى باسىپ قالعاندا لايلى جولمەن جوعارى قاراي جۇگىرگەنىن ايتتى. «كوزدى اشىپ-جۇمعانشا، بازار كوز الدىمدا جويىلىپ كەتتى»، — دەدى ول. ول ءۇش كۇننەن كەيىن وتباسىمەن قاۋىشتى.
Save the Children قايىرىمدىلىق ۇيىمىنىڭ مالىمەتىنشە، سۋ تاسقىنىنان كەمىندە 69 مەكتەپ قيراپ نەمەسە زاقىمدانىپ، 19 مىڭعا جۋىق بالا زارداپ شەككەن. ەڭ قاتتى زارداپ شەككەن ايماقتاردىڭ ءبىرى دحادينگتە ءبىر توپ وقۋشى تۇسكى ۇزىلىسكە سىنىپتان شىعىپ، امان قالعان. باسقالارى مۇعالىمدەردىڭ تەز ەۆاكۋاسيالاۋ تۋرالى ەسكەرتۋىنەن كەيىن سۋ كەلىپ جەتكەنشە ۇلگەرگەن.
ءبىر بالانىڭ اناسى Associated Press-كە مۇعالىمدەردىڭ وقۋشىلارعا: «تاسقىن كەلە جاتىر، سومكەلەرىڭدى تاستاڭدار»، — دەپ ەسكەرتكەنىن ايتتى. «وسىلايشا ولار امان قالدى». نەپالدا ازىرگە 3700-دەن استام ادام قۇتقارىلدى. ەل بيلىگى جەكسەنبىدە 2502 ادام، ونىڭ ىشىندە 592 شەتەلدىك حابارسىز كەتكەنىن حابارلادى. رەسمي دەرەك بويىنشا قازا تاپقاندار سانى 781-گە جەتتى.
اقش گەولوگيالىق قىزمەتىنىڭ مالىمەتىنشە، سارسەنبى كۇنى تاڭەرتەڭ گيمالايدىڭ نەپال-تيبەت شەكاراسىنداعى ايماقتا مۇزدىقتىڭ وپىرىلۋى سالدارىنان سۋ مەن قوقىس اعىنى تومەنگە قاراي جىلجىعان. نەپالدىڭ سىرتقى ىستەر ءمينيسترى كليماتتىق داعدارىسقا جاھاندىق جاۋاپ قاجەت ەكەنىن ايتىپ، نەپالدىقتار پلانەتانىڭ قازبالى وتىن شىعارىندىلارىنا از ۇلەس قوسقانىنا قاراماستان، «كليماتتىڭ وزگەرۋىنىڭ باستى قۇرباندارىنا» اينالعانىن اتاپ ءوتتى.