نەپالدا جويقىن سۋ تاسقىنىنان كەيىن مورگتار تولىپ كەتكەندىكتەن، بەلگىسىز مايىتتەردى جاپپاي جەرلەۋ باستالدى، دەپ حابارلايدى infohub.kz سايتى.
The Guardian مالىمەتىنشە، ستيحيا قۇرباندارىنىڭ سانى ءوسىپ كەلەدى، ال بيلىك قايتىس بولعانداردى انىقتاۋعا ۇلگەرمەيتىنىن مويىنداپ وتىر. كوپتەگەن مايىتتەر تانىلماستاي بولىپ وزگەرگەن جانە تۇرعىلىقتى جەرلەرىنەن كوپتەگەن شاقىرىم قاشىقتىقتان تابىلعان. دەنەلەردى ءقاۋىپسىز ساقتاۋعا ورىن جەتىسپەگەندىكتەن، جاپپاي جەرلەۋ تۋرالى شەشىم قابىلداندى.
جەرلەۋ الدىندا ءاربىر قايتىس بولعان ادامنان دنق ۇلگىلەرى الىنىپ، دەنەلەرگە ارنايى بەلگىلەر قويىلادى، كەيىن تۋىستارى ولاردى الىپ، جەرلەۋ راسىمدەرىن وتكىزە الادى.
ەڭ كوپ زارداپ شەككەن ايماقتان شامامەن 160 كم تومەن قاراي ورنالاسقان چيتۆان وكرۋگىندە وزەن جاعاسىنا 250-دەن استام ءمايىت شىعارىلدى. الايدا قاتتى زاقىمدانۋ سالدارىنان ولاردىڭ تەك توعىزى عانا انىقتالدى. كوپشىلىگى، كەم دەگەندە ۋاقىتشا، قالا شەتىندەگى ورمانعا جەرلەنەتىن بولادى.
انىقتاۋدى جىلدامداتۋ ءۇشىن جەرگىلىكتى شەنەۋنىكتەر ەرەكشە ادىسكە جۇگىندى: ولار ادامداردان مايىتتەردىڭ فوتوسۋرەتتەرىن قاراپ، ەرەكشە بەلگىلەردى — القالاردى، نەكە ساقينالارىن، تاتۋيروۆكالاردى، تىرتىقتاردى ىزدەۋدى سۇرادى. سۋرەتتەر نەپال پوليسياسىنىڭ سايتىندا، سونداي-اق كاتماندۋداعى مورگ عيماراتىنىڭ قابىرعالارىندا ورنالاستىرىلعان.
ەسكە سالايىق، 26 تامىزدا جۇڭگو مەن نەپال اراسىنداعى شەكارا وتكەلى اۋدانىندا كوشكىن ءجۇرىپ، جول قوزعالىسى، بايلانىس جانە ەلەكترمەن جابدىقتاۋ بۇزىلعان بولاتىن. كەيىن كۇشتى سۋ تاسقىنى بولىپ، مىڭداعان ادام حابار-وشارسىز كەتتى. سۋدىڭ سەبەبى جەر سىلكىنىسى مەن ودان كەيىنگى كوشكىن دەپ اتالدى. سوڭعى مالىمەتتەر بويىنشا، قازا تاپقاندار سانى 900-دەن استى.
سونىمەن قاتار، نەپال مەن جۇڭگو شەكاراسىنداعى اپات ايماعىندا قازاقستاننىڭ ءۇش ازاماتشاسىن ىزدەۋ جالعاسۋدا.