نەپال بيلىگى تاعى دا سۋ تاسقىنى بولۋى مۇمكىن ەكەنىن ەسكەرتىپ، سۋ باسقان اۋداندارداعى تۇرعىنداردى جوعارى دايىندىقتا بولۋعا شاقىردى. بۇل تۋرالى infohub.kz سايتى حابارلايدى.
بحوتەكوشي وزەنىندەگى سۋ دەڭگەيى كوتەرىلگەننەن كەيىن جەكسەنبى تاڭەرتەڭ تۇرعىنداردىڭ ۇيالى تەلەفوندارىنا سۋ تاسقىنى تۋرالى ەسكەرتۋ جىبەرىلدى. قۇتقارۋشىلار كاتماندۋدى سارسەنبىدەگى اپاتتى سۋ تاسقىنىنان قاتتى زارداپ شەككەن اۋدانداردىڭ بىرىمەن بايلانىستىراتىن نەگىزگى تاس جولدى تازارتۋ جۇمىستارىن جۇرگىزۋدە.
نەپال مەن قىتايدىڭ تيبەت ايماعىنداعى سۋ تاسقىنىنان قازا تاپقانداردىڭ جالپى سانى 750-گە جەتتى، تاعى 3 000-نان استام ادام حابارسىز كەتتى. نەپالدىڭ توتەنشە جاعدايلار اگەنتتىگىنىڭ مالىمەتىنشە، ەلدە قازا تاپقاندار سانى 734-كە جەتىپ، 2 498 ادام ىزدەستىرىلۋدە. جۇڭگو بيلىگى 16 ادامنىڭ قازاسىن راستاپ، 546 ادامنىڭ حابارسىز كەتكەنىن حابارلادى، ونىڭ ىشىندە 100-دەن استام نەپالدىقتار جانە وننان استام ەلدىڭ ازاماتتارى بار.
نەپالدىڭ توتەنشە جاعدايلاردى قىسقارتۋ جانە باسقارۋ ۇلتتىق ورگانىنىڭ باس ديرەكتورى دحارام رادج ۋپرەتيدىڭ Associated Press اگەنتتىگىنە ايتۋىنشا، سوڭعى ەسكەرتۋلەر جۇڭگو بيلىگىنىڭ نەپالدىق ارىپتەستەرىنە وزەننىڭ جوعارعى اعىسىنداعى سۋ دەڭگەيىنىڭ كوتەرىلۋى تۋرالى حابارلاماسىنان كەيىن جاسالدى.
قىزىل كرەست ۇيىمىنىڭ مالىمەتىنشە، نەپالدا 93 000-عا جۋىق ادام زارداپ شەككەن. نەپال سەنبى كۇنى حالىقارالىق قارجىلىق كومەككە، سونداي-اق اۋىر جۇك كوتەرەتىن دروندار، دنق تەستىلەۋ جيىنتىقتارى جانە ءمايىت ساقتايتىن مۇزداتقىشتار سياقتى ارنايى قۇتقارۋ قۇرالدارىنا ۇندەۋ جاسادى.
اقش پەن كانادا ءارقايسىسى شامامەن 3،6 ميلليون دوللار كولەمىندە گۋمانيتارلىق كومەك كورسەتەتىنىن مالىمدەدى. ۇلىبريتانيا 6،8 ميلليون دوللار كومەك ۋادە ەتسە، بىرىككەن ۇلتتار ۇيىمى توتەنشە جاعدايلارعا ارنالعان قوردان 2،5 ميلليون دوللار ءبولدى. ەۋروپالىق وداق جۇما كۇنى 2،3 ميلليون دوللار كومەك كورسەتەتىنىن ۋادە ەتتى، ال حالىقارالىق قىزىل كرەست جانە قىزىل جارتى اي قوعامدارى فەدەراسياسى 1 ميلليون دوللاردان استام قاراجات ءبولىپ، 31 ميلليون دوللار كولەمىندە توتەنشە كومەك شاراسىن باستادى.
جۇڭگو ءتوراعاسى سي سزينپين جۇما كۇنى بەيجىڭنىڭ كومەك كورسەتۋگە دايىن ەكەنىن ءبىلدىردى.