نەپالعا اپتا باسىندا ەلدىڭ شەكارالاس اۋداندارىن شارپىعان اپاتتى سۋ تاسقىنىنان كەيىن قالپىنا كەلتىرۋگە 4-5 ميلليارد دوللار قاجەت بولادى. بۇل تۋرالى نەپالدىڭ قارجى ءمينيسترى سۆارنيم ۆاگلە Reuters اگەنتتىگىنە بەرگەن سۇحباتىندا مالىمدەدى. ونىڭ ايتۋىنشا، بۇل سوما ازىرگە الدىن الا — بيلىك شىعىن مەن قيراۋ كولەمىن باعالاۋدى جالعاستىرۋدا، دەپ حابارلايدى infohub.kz سايتى.
نەپالدىڭ سىرتقى ىستەر ءمينيسترى شيشير كحانالدىڭ ايتۋىنشا، ەلگە جەرگىلىكتى مامانداردىڭ تاجىريبەسى جەتكىلىكسىز بولاتىن ارنايى جانە تەحنيكالىق سالالاردا شەتەلدىك كومەك قاجەت. اتاپ ايتقاندا، بۇل تۋننەلدەردەن ادامداردى قۇتقارۋ، كوپىرلەر قيراعان اۋدانداردا كولىك جانە بايلانىس جۇيەسىن قالپىنا كەلتىرۋ، قازا تاپقانداردى انىقتاۋ، دنك-تەست جۇرگىزۋ جانە مايىتتەردى ۇزاق ۋاقىت ساقتاۋ ماسەلەلەرى. «ءبىز تاجىريبە مەن تەحنيكالىق ءبىلىم جەتىسپەيتىن سالالاردا وسىنداي ارنايى قىزمەتتەر مەن تەحنيكالىق كومەك سۇرادىق»، — دەدى كحانال.
سونىمەن قاتار، نەپال قاراپايىم ىزدەۋ-قۇتقارۋ جۇمىستارىنا شەتەلدىك كوماندالاردى تارتۋدى قاجەت دەپ سانامايدى. ءمينيستردىڭ ايتۋىنشا، بۇل مىندەتتى جەرگىلىكتى قۇتقارۋشىلار اتقارادى. ءۇندىستان مەن جۇڭگو ەلگە ۋاقىتشا Bailey Bridge كوپىرلەرىن بەرۋى ءتيىس، بۇل كولىك جانە بايلانىس جۇيەسىن قالپىنا كەلتىرۋگە مۇمكىندىك بەرەدى. زارداپ شەككەن اۋداندا جيىرماعا جۋىق كوپىر قيراعان.
تابيعي اپات سارسەنبىدە گيمالايداعى مۇزدىقتىڭ قۇلاۋىنان باستالدى. تاۋ وزەندەرىنىڭ بويىمەن تاس، مۇز، لاي جانە قوقىستىڭ الىپ اعىنى ءوتتى. 26 تامىزدا نەپال مەن جۇڭگو شەكاراسىنا جاقىن ورنالاسقان راسۋۆا بيىك تاۋلى اۋدانىندا سۋ، لاي جانە تاس اعىندارى ۇيلەردى، جولداردى، كوپىرلەردى، اۆتوموبيلدەردى، گيدروەنەرگەتيكا نىساندارىن، مەكتەپتەر مەن اۋرۋحانالاردى شايىپ كەتتى.
نەپال مەن قىتايدىڭ تيبەتىندەگى سۋ تاسقىنى سالدارىنان 600-دەن استام ادام قازا تاپتى، تاعى 2 مىڭنان استام ادام حابار-وشارسىز كەتتى. بيلىك جاڭا مايىتتەردىڭ تابىلۋى مۇمكىن ەكەنىن ەسكەرتەدى. كحانالدىڭ ايتۋىنشا، اۋرۋحانالار قازا تاپقاندارعا تولىپ، ولاردى ساقتاۋعا ارنالعان توڭازىتقىش جابدىقتار جەتىسپەيدى.
بولاشاقتا نەپالعا قيراعان ينفراقۇرىلىمدى قالپىنا كەلتىرۋ جانە زارداپ شەككەن اۋدانداردى وڭالتۋ ءۇشىن حالىقارالىق قولداۋ قاجەت بولادى. الدىڭعى كۇنى قازاقستاننىڭ سىرتقى ىستەر مينيسترلىگى نەپال مەن جۇڭگو شەكاراسىنداعى اپات ايماعىنان ەلىمىزدىڭ ءۇش ازاماتشاسىن ىزدەۋ ءجۇرىپ جاتقانىن حابارلادى.