نەپالداعى جويقىن سۋ تاسقىنىنان كەيىن قۇتقارۋشىلار سەنبى كۇنى تاعى ەكى ادامدى تىرىدەي تاپتى. بۇل تۋرالى infohub.kz سايتى حابارلايدى.
قىتايلىق ەر ادام مەن نەپالدىق ايەل ەكى بولەك وپەراسيا بارىسىندا امان الىندى. بيلىك 10 كۇن بۇرىن بولعان سۋ تاسقىنىنان كەيىن مىڭداعان ادامدى ىزدەۋدى جالعاستىرۋدا.
نەپال اسكەرىنىڭ مالىمەتىنشە، ارميا مەن وڭتۇستىك كورەيانىڭ توتەنشە جاعداي ماماندارىنان قۇرالعان بىرلەسكەن توپ جوعارعى تريشۋلي-1 گيدروەنەرگەتيكالىق جوباسىنداعى 225 مەترلىك تۋننەلدەن ەر ادامدى قۇتقارعان. ول ءقازىر مەديسينالىق تەكسەرۋدەن وتۋدە. ونىڭ تۋننەلدەن شىعارىلعان ءساتى تۇسىرىلگەن سۋرەتتەردە كورىنەدى، كەيىن ونى تىكۇشاقپەن ەۆاكۋاسيالاعان.
قۇتقارۋ جۇمىستارى نەپالداعى ونداعان گيدروەنەرگەتيكالىق جوبالارعا باعىتتالعان. وندا 900-گە جۋىق جۇمىسشى حابارسىز كەتكەن، ولاردىڭ 500ء-ى ۇلكەن تۋننەلدەردە قامالىپ قالعان بولۋى مۇمكىن. ءۇندىستان، جۇڭگو، وڭتۇستىك كورەيا جانە اقش-تىڭ حالىقارالىق قۇتقارۋ توپتارى قيراعان قۇرىلىستار مەن تۋننەلدەردى ارالاپ، ءتىرى قالعانداردى ىزدەۋدە.
بۇعان دەيىن جۇما كۇنى تريشۋلي وزەنىندەگى گيدروستانسيانىڭ تاعى ءبىر تۋننەلىنەن ەكى نەپالدىق جۇمىسشى قۇتقارىلعان بولاتىن. ساراپشىلاردىڭ ايتۋىنشا، ۋاقىت وتكەن سايىن تۋننەلدەردە ءتىرى ادامداردى تابۋ مۇمكىندىگى ازايۋدا.
64 جاستاعى نەپالدىق ايەل نۋۆاكوت قالاسىنداعى قيراعان ۇيدەن امان الىندى. نەپال اسكەرى جاريالاعان فوتوسۋرەتتەردە قۇتقارۋشىلاردىڭ ايەلدى لاي ىشىنەن تاۋىپ، ءقاۋىپسىز جەرگە شىعارىپ، ەمدەلۋ ءۇشىن كاتماندۋعا اۋە ارقىلى جەتكىزگەنى كورسەتىلگەن. ونى ۇيدەن شىعارعان كەزدە نەپال پوليسياسىنىڭ قىزمەتكەرلەرى قۋانىشپەن ايعايلاعان. ءۇيدىڭ تومەنگى بولىگى قالىڭ لايعا باتقان ەدى.
ەسكە سالايىق، 26 تامىزداعى مۇزدىق پەن جارتاستىڭ وپىرىلۋىنان تۋىنداعان سۋ تاسقىنىنان زارداپ شەككەندەردى ىزدەۋ جۇمىستارى جالعاسۋدا. تاسقىن ينفراقۇرىلىمعا وراسان زور شىعىن كەلتىردى: 40-تان استام كوپىر قۇلاپ، وزەندەردىڭ دەڭگەيى كۇتپەگەن جەردەن كوتەرىلدى. نەپالدىڭ توتەنشە جاعدايلار جونىندەگى اگەنتتىگىنىڭ مالىمەتىنشە، سۋ تاسقىنىنان كەمىندە 1375 ادام قازا تاۋىپ، 5 مىڭنان استام ادام حابارسىز كەتكەن.