نەپالدا قىتايمەن شەكاراداعى كوشكىننەن تۋىنداعان ءىرى سۋ تاسقىنى بولدى. تابيعي اپات سالدارىنان جۇزدەگەن ادام حابارسىز كەتتى، دەپ حابارلايدى infohub.kz سايتى.
ريا ءنوۆوستيدىڭ حابارلاۋىنشا، تاڭەرتەڭ تاۋلى ايماقتا قاتتى سۋ اعىنى بحوتە-كوشي وزەنىنە قۇيىلدى. ستيحيا راسۋۆا وكرۋگىنىڭ بىرنەشە اۋدانىنا ەلەۋلى زيان كەلتىردى. بيلىك تومەنگى اعىستاعى ەلدى مەكەندەردە جوعارى دايىندىق رەجيمىن ەنگىزدى. نەپالدىق ب ا ق دەرەكتەرىنە سايكەس، سۋ جۇڭگو تاراپىنان كەلگەن.
نەپالدىڭ تۋريزم باسقارماسى سۋ تاسقىنىنان كەيىن 380-نەن استام ءتۋريستىڭ حابارسىز كەتكەنىن حابارلادى. تۋريستىك كومپانيالاردان الىنعان الدىن الا مالىمەتتەر بويىنشا، زارداپ شەككەن اۋدانداردا 384 ادام تابىلمادى، ونىڭ ىشىندە 291 شەتەل ازاماتى جانە 93 نەپالدىق بار.
نەپالدىڭ سىرتقى ىستەر ءمينيسترى شيشير كحانال ءىرى سۋ تاسقىنىنىڭ سەبەبى جەر سىلكىنىسى جانە ودان كەيىنگى كوشكىن بولعانىن مالىمدەدى. ونىڭ ايتۋىنشا، جەر سىلكىنىسى جەرگىلىكتى ۋاقىت بويىنشا تاڭعى 08:37-دە، ياعني استانا ۋاقىتىمەن 07:52-دە بولعان. جەر استى دۇمپۋلەرىنەن ءىرى كوشكىن ءجۇرىپ، وزەندى بوگەپ، سۋ تاسقىنىن تۋدىرعان.
ۇكىمەت قۇتقارۋ جۇمىستارىن باستاپ، زالال تۋرالى تولىق دەرەكتەردى جيناۋدا. وقيعانىڭ ءمان-جايى كورشى ەلدەرمەن بىرلەسىپ ناقتىلانۋدا.