نەپالداعى جويقىن سۋ تاسقىنى 1 287 ادامنىڭ ءومىرىن قيدى، دەپ حابارلايدى infohub.kz سايتى The Kathmandu Post-كە سىلتەمە جاساپ.
توتەنشە جاعدايلاردى باسقارۋ ۇلتتىق ورگانىنىڭ دەرەگىنشە، قازا تاپقانداردىڭ دەنەلەرى مەن سۇيەكتەرى ەلدىڭ سەگىز اۋدانىنان تابىلعان. قازىرگى ۋاقىتتا 96 ادامنىڭ جەكە باسى انىقتالىپ، دەنەلەرى تۋىستارىنا تاپسىرىلعان. جاراقات العان 5،3 مىڭنان استام ادامعا مەديسينالىق كومەك كورسەتىلگەن.
ىزدەستىرىلىپ جاتقانداردىڭ رەسمي تىزىمىنە شامامەن 5 083 ادام ەنگىزىلگەن. بيلىك بۇل كورسەتكىشكە انىقتالماعان دەنەلەر دە كىرگەنىن، سوندىقتان ول شىنىمەن تابىلماعان ادامداردىڭ ناقتى سانىن كورسەتپەيتىنىن اتاپ ءوتتى. سونىمەن قاتار، تىزىمدە 583 شەتەل ازاماتى بار.
قۇتقارۋشىلار 13 013 ادامدى ءقاۋىپسىز ايماقتارعا ەۆاكۋاسيالادى. وپەراسياعا نەپال ارمياسى، پوليسياسى جانە قارۋلى كۇشتەرى جۇمىلدىرىلعان. بارلىعى قۇتقارۋ جانە قالپىنا كەلتىرۋ جۇمىستارىنا 21 مىڭنان استام قۇقىق قورعاۋ قىزمەتكەرى تارتىلدى.
تابيعي اپات ەلدىڭ ينفراقۇرىلىمىنا ەلەۋلى زيان كەلتىردى. الدىن الا باعالاۋ بويىنشا، 7 570 جەكە تۇرعىن ءۇي قيراپ، 48 مەملەكەتتىك عيمارات، 18 مەكتەپ جانە جەتى مەديسينالىق مەكەمە زاقىمدانعان نەمەسە جويىلعان. شامامەن 55 شاقىرىم جول، 33 اۆتوموبيل جانە 68 اسپالى كوپىر تولىعىمەن قيراعان.
قۇتقارۋشىلار زارداپ شەككەن اۋداندارعا قۇرلىق جانە اۋە جولدارى ارقىلى گۋمانيتارلىق كومەك جەتكىزۋدى جالعاستىرۋدا. بايلانىس بىرتىندەپ قالپىنا كەلۋدە: Nepal Telecom-تىڭ زاقىمدانعان 120 مۇناراسىنىڭ 116-سى جۇمىس ىستەپ تۇر، Ncellء-دىڭ 78 مۇناراسىنىڭ 75ء-ى قالپىنا كەلتىرىلدى. بيلىك زارداپ شەككەن اۋداندارعا قۇتقارۋ جانە قالپىنا كەلتىرۋ جۇمىستارىن جۇرگىزۋ ءۇشىن جەدەل قارجى ءبولدى.
اپات 26 تامىزدا گيمالايداعى مۇزدىقتىڭ وپىرىلۋىنان باستالدى. تاس، مۇز، لاي جانە قوقىستىڭ الىپ اعىنى تاۋ وزەندەرىنىڭ جۇيەسىمەن ءوتتى. بيلىكتىڭ باعالاۋىنشا، نەپالعا سۋ تاسقىنىنان كەيىنگى قالپىنا كەلتىرۋگە 5 ميلليارد دوللارعا دەيىن قاراجات قاجەت.
بۇعان دەيىن نەپال مەن جۇڭگو شەكاراسىنداعى اپات ايماعىندا قازاقستاننىڭ ءۇش ازاماتشاسى ىزدەستىرىلىپ جاتقانى حابارلانعان.