نەپالداعى اپات ودان ءارى ۋشىعىپ كەلەدى: ۇكىمەتتىڭ سوڭعى دەرەكتەرى بويىنشا، جويقىن سۋ تاسقىنى سالدارىنان قازا تاپقاندار سانى 734 ادامعا جەتتى، دەپ حابارلايدى infohub.kz سايتى.
جاڭارتىلعان مالىمەتكە سايكەس، حابار-وشارسىز كەتكەندەر سانى 2 498 ادامدى قۇرايدى، ونىڭ 589-ى — شەتەل ازاماتتارى. بارلىق زارداپ شەككەن ايماقتاردا قۇتقارۋ جۇمىستارى جالعاسۋدا. ىزدەۋ-قۇتقارۋ جانە گۋمانيتارلىق وپەراسيالارعا 19 895 قاۋىپسىزدىك قىزمەتكەرى تارتىلعان، ونىڭ ىشىندە نەپال ارمياسىنىڭ 8 399 اسكەري قىزمەتشىسى، 7 213 پوليسەي جانە 4 203 قارۋلى پوليسيا كۇشتەرىنىڭ جاۋىنگەرى بار.
بيلىك وكىلدەرىنىڭ مالىمدەۋىنشە، قازىرگى ۋاقىتتا 8 186 ادام قۇتقارىلعان. اپاتتىڭ اۋقىمى قازا تاپقانداردى انىقتاۋدا ۇلكەن قيىندىقتار تۋعىزۋدا: تانىلماعان مايىتتەر ەلدىڭ ءارتۇرلى ايماقتارىنداعى 21 اۋرۋحاناعا ساقتاۋ جانە كەيىننەن تانۋ ءۇشىن جىبەرىلدى.
ەسكە سالا كەتەيىك، 26 تامىزدا جۇڭگو مەن نەپال اراسىنداعى شەكارا وتكەلىنىڭ ماڭىندا كوشكىن ءجۇرىپ، جول قوزعالىسى، بايلانىس جانە ەلەكترمەن جابدىقتاۋ بۇزىلعان ەدى. كەيىننەن جەر سىلكىنىسى مەن ودان كەيىنگى كوشكىننەن تۋىنداعان قاتتى سۋ تاسقىنى ادامداردىڭ جاپپاي حابار-وشارسىز جوعالۋىنا اكەلدى.
كەشە قازاقستاننان كەلگەن ءتۋريستىڭ ىزدەستىرىلىپ جاتقانى بەلگىلى بولدى، ول تۋريستىك توپ قۇرامىندا قىتايدان نەپالعا شەكارادان وتكەن ەدى. بۇگىن سىرتقى ىستەر مينيسترلىگى تاعى ءبىر قازاقستاندىق ايەلدىڭ ىزدەستىرىلىپ جاتقانىن حابارلادى.
سوڭعى مالىمەتتەر بويىنشا، جاعاسىنان اسقان كولگە بايلانىستى نەپالداعى قۇتقارۋ جۇمىستارىن ۋاقىتشا توقتاتۋعا تۋرا كەلدى.