وتكەن سارسەنبىدە مۇزدىقتىڭ وپىرىلۋىنان تۋىنداعان الاپات سۋ تاسقىنى گيمالاي اڭعارىن شارپىپ، بىرنەشە اۋىلدى شايىپ كەتتى. نەپالدىڭ توتەنشە جاعدايلار جونىندەگى باسقارماسىنىڭ مالىمەتىنشە، سودان بەرى 12 مىڭعا جۋىق ادام قۇتقارىلدى، دەپ حابارلايدى infohub.kz سايتى.
الايدا مىڭداعان ادام، ونىڭ ىشىندە ءۇندىستان، ۇلىبريتانيا، اۋستراليا، اقش، مالايزيا جانە باسقا ەلدەردىڭ جۇزدەگەن ازاماتتارى ءالى دە حابارسىز. ءبىر اپتا وتكەن سوڭ قۇرباندار سانىنىڭ ارتۋى مۇمكىن دەگەن ءقاۋىپ كۇشەيىپ كەلەدى.
قىتايدىڭ مەملەكەتتىك باق-ى شەكارانىڭ تيبەتتىك بولىگىندە امان قالعاندار تۋرالى حابارلاماعان، ءبىراق ىزدەۋ جالعاسۋدا. 1950 جىلدارى تيبەتتى اننەكسيالاعان بەيجىڭ ايماقتى قاتاڭ باقىلايدى. بارلىق اقپارات تەك مەملەكەتتىك ب ا ق ارقىلى تاراتىلادى، ال شەتەلدىك جۋرناليستەر رۇقساتسىز وندا بارا المايدى.
قىتايدىڭ مەملەكەتتىك باق-ىنىڭ حابارلاۋىنشا، اۋىر تەحنيكانى قولدانىپ، تاۋلىك بويى جۇمىس ىستەپ جاتقان قۇتقارۋشىلار نەپال مەن تيبەت اراسىنداعى گيرونگ شەكارا وتكەلىنە اپاراتىن جولدى قايتا اشىپ، قوقىستاردان تازارتتى. بۇل ىزدەۋ جۇمىستارىن جىلدامداتادى. قۇتقارۋ وپەراسيالارى قيىن جاعدايدا جالعاسۋدا، ال جۇڭگو مەن ءۇندىستاننىڭ ماماندارى شالعاي اۋداندارعا جەتۋ ءۇشىن ۋاقىتشا كوپىرلەر سالۋعا كومەكتەسۋدە. قيىن جەرلەردە امان قالعانداردى ىزدەۋ ءۇشىن ۇشقىشسىز اپپاراتتار قولدانىلۋدا.
بۇۇ-نىڭ گۋمانيتارلىق اگەنتتىگىنىڭ مالىمەتىنشە، قازىرگى باستى ماسەلە — قولجەتىمدىلىك، ويتكەنى 40-تان استام كوپىر قيراعان. ەڭ شالعاي قاۋىمداستىقتار اسكەري تىكۇشاقتاردىڭ كومەگىمەن قامتاماسىز ەتىلۋدە، ال اۋىلداردا ءالى كۇنگە دەيىن وتىن مەن ەلەكتر قۋاتى تاپشى.
تيبەتتەگى سۋ تاسقىنىنىڭ تولىق اسەرى بەلگىسىز. جۇڭگو مەملەكەتتىك ب ا ق ارقىلى شەكارا ماڭىنداعى اپاتتى كورسەتەتىن اقپارات تاراتقانىمەن، قۇرباندار مەن جەرگىلىكتى تۇرعىندارعا اسەرى تۋرالى از مالىمەت بەرىپ وتىر.
نەپالدا نۋۆاكوت جانە راسۋۆا اۋداندارىندا 27 نىساندا — نەگىزىنەن مەكتەپتەردە — 3500-گە جۋىق ادام باسپاناسىز قالدى، بۇل ءبىلىم بەرۋ پروسەسىن بۇزادى. بۇۇ-نىڭ گۋمانيتارلىق اگەنتتىگىنىڭ ايتۋىنشا، ولار ءۇشىن قازىرگى باسىمدىق — «گۋمانيتارلىق كومەك الۋ، جاقىندارىنىڭ سۇيەگىن تاۋىپ، انىقتاۋ، حابارسىز كەتكەن تۋىستارىن ىزدەۋ، بولىنگەن بالالاردى قايتا بىرىكتىرۋ جانە پسيحولوگيالىق قولداۋ الۋ».
اگەنتتىك قوسقانداي، ادامدار شامادان تىس تولعان باسپانالاردا، لاستانعان سۋ مەن زاقىمدالعان مەديسينالىق مەكەمەلەردىڭ سالدارىنان مۋسسون ماۋسىمىنىڭ ورتاسىندا تۇرعىندار اراسىندا اۋرۋ تارالۋ ءقاۋپى ارتىپ وتىر.
نەپالدىڭ پرەمەر-مينيسترى بالەندرا شاح امان قالعانداردىڭ ءومىرىن قورعاۋعا، مەديسينالىق كومەك پەن پسيحولوگيالىق كەڭەس بەرۋگە ەرەكشە نازار اۋدارىلاتىنىن ايتتى.
نەپال ۇكىمەتى مەن بۇۇ ءتورت ايلىق جەدەل گۋمانيتارلىق ۇندەۋ جاساۋعا كەلىستى.