نەپال مەن تيبەتتە سۋ تاسقىنىنان زارداپ شەككەن اۋدانداردا قۇتقارۋ جۇمىستارى ۋاقىتشا توقتاتىلعاننان كەيىن قايتا جانداندى. بۇعان دەيىن تاۋدا پايدا بولعان كولدىڭ جارىلۋ قاۋپىنە بايلانىستى ىزدەۋ-قۇتقارۋ وپەراسيالارى توقتاتىلعان ەدى. تاسقىن سالدارىنان قازا تاپقاندار سانى 552-گە جەتتى، تاعى مىڭعا جۋىق ادام حابار-وشارسىز كەتكەن، دەپ حابارلايدى infohub.kz.
نەپالدا 547 ادام، تيبەتتە بەس ادام قازا تاپتى. مۇزدىقتىڭ قوزعالۋىنان سۋ، لاي، تاس جانە مۇز اعىنى پايدا بولىپ، تابيعي اپاتقا ۇلاسقان.
اپاتتان كەيىن پايدا بولعان كولدە سۋ دەڭگەيى كوتەرىلە بەردى. بەيسەنبىگە قاراعان ءتۇنى ونىڭ كولەمى 2،5 ملن تەكشە مەتردەن استى. جاڭا تاسقىن قاۋپىنە بايلانىستى قۇتقارۋ جۇمىستارى شامامەن ءۇش ساعاتقا توقتاتىلدى، الايدا كەيىن تاۋەكەل باقىلاۋدا دەپ باعالاندى.
90 مىڭنان استام ادام زارداپ شەكتى. تاسقىن جولداردى، كوپىرلەردى جانە ەنەرگەتيكالىق نىسانداردى قيراتتى. تيبەتتە 558 ادام حابار-وشارسىز كەتكەن، ونىڭ ىشىندە 260 شەتەلدىك بار.
جۇڭگو ءتوراعاسى سي سزينپين مۇزدىق كولدەر مەن كوشكىندەردى باقىلاۋدى كۇشەيتۋدى تاپسىردى. ال نەپال ءبىرقاتار ەلدەردىڭ قوسىمشا ىزدەۋ-قۇتقارۋ توپتارىن جىبەرۋ تۋرالى ۇسىنىستارىنان باس تارتتى.
Reuters دەرەكتەرىنە سۇيەنسەك، نەپالعا كومەك كورسەتۋدى ءۇندىستان، جۇڭگو، اقش، ۇلىبريتانيا، جاپونيا، وڭتۇستىك كورەيا، شري-لانكا جانە بانگلادەش ۇسىنعان.
بۇعان دەيىن «كۋرسيۆ» ءسىم نەپال-قىتاي شەكاراسىندا سۋ تاسقىنىنان كەيىن حابار-وشارسىز كەتكەن ەكى قازاقستاندىق ايەلدى ىزدەپ جاتقانىن جازعان بولاتىن. الدىن الا مالىمەت بويىنشا، ەكەۋى دە تابيعي اپات ايماعىندا بولعان.