نەپالدى تاعى دا تابيعات اپاتى دۇرلىكتىردى: ءتورت كۇن بويى توقتاماعان نوسەر جاڭبىر ەلدىڭ تۇكپىر-تۇكپىرىندە سۋ تاسقىنى مەن كوشكىن تۋدىردى. كەمىندە 21 ادام قازا تاپتى، بەسەۋى ءىز-تۇزسىز جوعالدى، تاعى بەسەۋى جاراقات الدى، دەپ حابارلايدى infohub.kz سايتى.
اۋا رايىنىڭ قولايسىزدىعى 24-27 قىركۇيەك ارالىعىندا ۇدەدى. ونىڭ سالدارىنان ءۇش مىڭعا جۋىق ادام ەۆاكۋاسيالاندى، جۇزدەگەن تۇرعىن ءۇي زاقىمدانىپ نەمەسە قيرادى.
نەپالدىڭ ورتالىق بولىگىنەن اعاتىن ناراياني وزەنىنىڭ سۋ دەڭگەيى ءقاۋىپتى توعىز مەتردەن اسىپ، ەلدى مەكەندەردى سۋ باسۋىنا بايلانىستى جاڭا ەسكەرتۋ جاريالاندى.
سونىمەن قاتار، كوشكىندەر ەلدىڭ ءتۇرلى ايماقتارىن جالعايتىن ماڭىزدى كولىك تورابى سانالاتىن چيتۆانعا اپاراتىن بىرنەشە تاسجولدى جاۋىپ تاستادى. بيلىك جاڭبىردىڭ جالعاسۋى جاڭا سۋ تاسقىنى مەن كوشكىن ءقاۋپىن ارتتىراتىندىقتان، ويپاتتى ايماقتاردىڭ تۇرعىندارىن ساق بولۋعا شاقىردى.
اپاتتار ءقاۋپىن ازايتۋ جانە ولاردى باسقارۋ جونىندەگى ۇلتتىق باسقارمانىڭ (NDRRMA) سوڭعى دەرەكتەرىنە سايكەس، كوشكىن سالدارىنان 14 ادام قازا تاپقان. كوشكىنگە بايلانىستى وقيعالاردا تاعى بەس ادام ءىز-تۇزسىز جوعالعان.
سۋ تاسقىنىنان ءتورت ادام قۇربان بولدى، تاعى ۇشەۋى توقتاۋسىز نوسەر جاڭبىردان قازا تاپتى.