يزرايل پرەمەر-مينيسترى بينيامين نەتانياحۋ تەل-اۆيۆتىڭ Flydubai اۋەكومپانياسىنىڭ ۇشاعىنداعى وقيعانى تەرگەۋگە قوسىلۋى مۇمكىن ەكەنىن جوققا شىعارمادى. بۇل تۋرالى ساياساتكەر Fox News تەلەارناسىنا بەرگەن سۇحباتىندا مالىمدەدى، دەپ حابارلايدى infohub.kz سايتى.
تەلەارنامەن اڭگىمە بارىسىندا يزرايل ۇكىمەتىنىڭ باسشىسى ۇستالعان ادامنىڭ ءقازىر جاۋاپ الىنىپ جاتقانىن اتاپ ءوتتى.
«شابۋىل جاساعان ۇشقىش ءقازىر ساۋد ارابياسىندا تەرگەۋدە. مەنىڭ ويىمشا، ول ءوزى تۋعان، نەمەسە كەم دەگەندە ۇشىپ شىققان ەميراتتارعا جەتكىزىلەدى. ءبىز بۇل تەرگەۋدى قاداعالايمىز، مۇمكىن وعان قاتىسامىز»، — دەدى نەتانياحۋ.
يزرايل اسكەري-اۋە كۇشتەرىنىڭ يسترەبيتەلدەرى ۇشاققا قاراي كوتەرىلدى. كەيىن اۋە كەمەسىنىڭ ساۋد ارابياسىنا قونعانى بەلگىلى بولدى. سودان سوڭ Flydubai اۋەكومپانياسى يزرايل تەلەديدارىنا دۋباي — تەل-اۆيۆ رەيسىندە ۇشقىشتار اراسىندا ۇشاق بورتىندا توبەلەس بولعانىن حابارلادى.
كوپ ۇزاماي ۇشاقتان العاشقى فوتو مەن ۆيدەو پايدا بولدى. سۋرەتتە شابۋىلداۋشىمەن كۇرەسكەن بولجامدى جولاۋشى بەينەلەنگەن. ال بيلىك ۇشقىشتاردىڭ ءبىرى ۇشاقتى ادەيى قۇلاتپاق بولعان دەگەن نۇسقانى تەكسەرۋدە. ونىڭ ارەكەتىن ەكىنشى ۇشقىش پەن ونىمەن كۇرەسكە ءتۇسىپ، اپاتتى بولدىرماعان يزرايلدىك جولاۋشىلار توقتاتقان بولجام بار.
بۇقارالىق اقپارات قۇرالدارىندا ۋكراينا مەن رەسەيدەن كەلگەن ۇشقىشتار جولاۋشى رەتىندە ۇشىپ، FlyDubai ۇشاعىنىڭ باسقارۋىن قولعا العانى تۋرالى دا حابارلاندى.
كەيىن FlyDubai ۇشاعىنىڭ بورتىندا ارىپتەسىنىڭ شابۋىلىنان زارداپ شەككەن ۇشقىش ءۇندىستان ازاماتى سميت ماچچحار بولعانى بەلگىلى بولدى.
Flydubai اۋەكومپانياسى وقيعا تەرگەۋى اياقتالعانشا يزرايلگە جانە كەرى باعىتتاعى رەيستەردى توقتاتتى.
يزرايل پرەمەر-مينيسترى بينيامين نەتانياحۋ توبەلەس شىعارعان ۇشقىشتى زارارسىزداندىرۋعا كومەكتەسكەن Flydubai رەيسىنىڭ جولاۋشىسىمەن كەزدەستى.
سونداي-اق وقيعا سالدارىنان جارالانعان ۇشاق كاپيتانىنىڭ جاعدايى تۋرالى دا بەلگىلى بولدى.