نيگەريانىڭ سولتۇستىك-باتىسىنداعى زامفارا شتاتىندا قارۋلى باندالار اۋىلدارعا شابۋىل جاساپ، كەمىندە 20 ادامنىڭ ءومىرىن قيدى، دەپ حابارلايدى infohub.kz سايتى.
تالاتا مافارا اۋدانىنا قاراستى ساۋنا وكرۋگىنىڭ وكىلى ناسيرۋ ءلاۋۋاليدىڭ AFP اگەنتتىگىنە ايتۋىنشا، شابۋىل سارسەنبى كۇنى جەرگىلىكتى ۋاقىت بويىنشا ساعات 15:00 مەن 16:00 ارالىعىندا بولعان. «بۇگىن كوپتەگەن قاراقشىلار ءبىزدىڭ قاۋىمداستىقتارىمىزعا باسىپ كىرىپ، كەزدەسكەن ادامداردىڭ ءبارىن نىساناعا الدى»، — دەيدى ول.
بۇل شابۋىلدار نيگەريانىڭ سولتۇستىك-باتىسى مەن ورتالىعىنداعى زورلىق-زومبىلىقتىڭ كۇشەيۋى اياسىندا ورىن الدى. سوڭعى اپتالاردا قارۋلى باندالار اۋىلدارعا شابۋىلداپ، مال ۇرلاپ، تۇرعىنداردى بوپسالاۋ ءۇشىن ۇرلاپ كەتۋدە.
سەيسەنبى كۇنى كەشكە كۆارا شتاتىندا كۇش قۇرىلىمدارى كەمىندە ءۇش كۇدىكتى قاراقشىنى جويىپ، بيزنەسمەن تۋكۋر ءساننيدى قۇتقاردى. بۇل تۋرالى نيگەريانىڭ The Punch باسىلىمى حابارلادى.
نيگەريادا قارۋلى توپتاردىڭ ءىرى كولەمدەگى اقشا تولەمىن تالاپ ەتىپ ادام ۇرلاۋى جيىلەگەن. بۇل جاعدايدى ەلدىڭ سولتۇستىك-شىعىسىنداعى «بوكو حارام» كوتەرىلىسىمەن شيەلەنىسكەن قاۋىپسىزدىك داعدارىسى ۋشىقتىردى. SBM Intelligence كومپانياسىنىڭ مالىمەتىنشە، 2024 جىلى شابۋىلداۋشىلار تولەم رەتىندە 1،6 ميلليون دوللاردان استام اقشا العان.
وسى ايدىڭ باسىندا وڭتۇستىك-باتىس ويو شتاتىنداعى ءۇش مەكتەپتەن ۇرلانعان ونداعان وقۋشى مەن ءمۇعالىم 56 كۇننەن كەيىن قۇتقارىلدى. پرەزيدەنت بولا تىنۋبۋدىڭ مالىمدەمەسىندە سەگىز كۇدىكتى ۇستالىپ، بەلگىسىز سانى جويىلعانى ايتىلدى. قورعانىس ءمينيسترى كريستوفەر مۋسانىڭ ايتۋىنشا، كۇدىكتىلەر كەپىلگە الىنعانداردى ۇكىمەتكە ءوز كومانديرلەرىن تۇرمەدەن بوساتۋ ءۇشىن قىسىم كورسەتۋ قۇرالى رەتىندە پايدالانباق بولعان.