نيگەريانىڭ مۇناي وندىرەتىن ريۆەرس شتاتىندا مۇناي تيەۋ كەمەسىنەن مۇناي ۇرلاۋ ارەكەتى كەمىندە 37 ادامنىڭ ولىمىنە سەبەپ بولدى. قۇربانداردىڭ كوبى ۋلى گازدى جۇتىپ قويعان. بۇل تۋرالى «جاستار جانە قورشاعان ورتانى قورعاۋ ورتالىعى» اتتى قوعامدىق ۇيىم جۇما كۇنى حابارلادى، دەپ حابارلايدى infohub.kz سايتى.
ۇيىمنىڭ مالىمەتىنشە، بەيسەنبى كۇنى قۇرباندار ءبىر مەزگىلدە «زاڭسىز قۇبىردان» ءوز قايىقتارىنا شيكى مۇناي قۇيىپ الۋعا تىرىسقان. بۇل ولاردىڭ جوعارى قىسىمداعى ۋلى گازدى جۇتۋىنا اكەلدى. ەرىكتىلەر جەلىسىنە سىلتەمە جاساعان ەسەپتە كوپتەگەن ادام ءالى دە حابارسىز كەتكەنى ايتىلادى.
نيگەريا پوليسياسى جۇما كۇنى وقيعانى راستادى، ءبىراق قازا تاپقاندار سانىن اتامادى جانە تەرگەۋ ءجۇرىپ جاتقانىن مالىمدەدى. «ريۆەرس شتاتىنىڭ پوليسيا باسقارماسى قازا بولعانداردى راستايدى. قۇرباندار شيكى مۇنايدى ۇرلاماق بولعان»، — دەدى ريۆەرس شتاتى پوليسياسىنىڭ وكىلى بلەسسينگ اگابە.
مۇناي ۇرلىعى — افريكاداعى ەڭ ءىرى مۇناي ءوندىرۋشى نيگەريانىڭ نيگەر ايماعىندا ءجيى كەزدەسەتىن قۇبىلىس. ونداعان جىلدار بويى جۇرگىزىلگەن مۇناي بارلاۋ جۇمىستارى حالىقتىڭ كەدەيلىگى مەن ەكولوگيالىق دەگراداسياعا اكەلدى.
نيگەريا ۇكىمەتى مۇناي ۇرلىعى جىل سايىن بىرنەشە ميلليارد دوللار شىعىن كەلتىرەتىنىن ايتىپ، بۇل ارەكەتكە قارسى كۇرەستى كۇشەيتىپ جاتىر.