Нигерияның солтүстік-шығысындағы Тараба штатындағы шалғай ауылға жасалған шабуылдан қаза тапқандар саны кемінде 48 адамға жетті. Бұл туралы жергілікті полиция Британдық хабар тарату корпорациясына мәлімдеді, деп хабарлайды infohub.kz сайты.
Алғашында тәртіп сақшылары Биннари ауылына мотоциклмен келген белгісіз қарулы топ шабуыл жасап, дүкендерді тонап, үйлерді өртеп жібергеннен кейін 10 адамның қаза тапқанын хабарлаған болатын.
Штат полициясының өкілі Виктор Мшелизаһтың айтуынша, жексенбі күні тағы да бірнеше мәйіт табылды. Оның сөзінше, кейбір құрбандар шабуылдаушылардан қашып бара жатып суға батып кетсе, тағы біразы жақын маңдағы бұталарда өлтірілген.
Сонымен қатар «Халықаралық амнистия» ұйымының Нигерия жөніндегі директоры өз ұйымы жергілікті дереккөздер мен қауымдастық мүшелерінің мәліметтеріне сүйене отырып, 52 адамның қаза тапқанын растағанын айтты.
Шабуыл мұсылмандардың түскі намазынан кейін басталып, қырғын төрт сағатқа дейін жалғасқан. Полиция қызметкерлері көмек сұраған дабылға жауап беріп, оқ тиген 10 мәйітті алғашында жинап алған.
Тәртіп сақшылары келген кезде шабуылдаушылар қашып кеткен, алайда полиция тыныштықты қалпына келтіру үшін ауданды патрульдеуді жалғастырған. Бұл туралы Тараба полициясы сенбі күні Британдық хабар тарату корпорациясына хабарлады.
«Біз белгісіз қарулы топты тарата алдық, алайда олар жағынан да, біз жағынан да шығын болған жоқ, өйткені жер бедері қиын және олар бұл жерге үйренген», — деді полиция ассистент-суперинтенданты Виктор Мшелизаһ.
Қауымдастық жетекшісі Мәлім Абубакар Сайфуллаһи «Франс Пресс» ақпарат агенттігіне шабуылдаушылардың әрқайсысында екі адамнан отырған 50-ге жуық мотоциклмен келгенін айтты.
«Олар дүкендерді тонап, ақша, азық-түлік және басқа да қажетті заттарды алып кетті. Сондай-ақ шабуылдан қашып бара жатқан адамдар тастап кеткен мотоциклдерді де алып кетті», — деді ол.
Шабуылдан аман қалған Исияку Муса «Франс Пресс» агенттігіне былай деді: «Адамдар шабуылдан құтылу үшін әр жаққа қашып жатты. Қайда бару қауіпсіз екенін ешкім білмеді».
«Халықаралық амнистия» ұйымының Нигерия жөніндегі директоры Иса Сануси бұл қырғынды бейтарап тергеуге шақырып, билікті ауылдық қауымдастықтарды «қайта-қайта жазасыз қатыгездік жасайтын қарулы топтардың қолында қалдырды» деп айыптады.
Нигерияның солтүстік-шығысындағы бірқатар аймақ жылдар бойы жиһадшы топтар мен қарулы бандалардың зорлық-зомбылығына ұшырап келеді. Олар қауымдастықтарға шабуыл жасап, тұрғындарды ұрлап, құн талап етеді. Мұндай қарулы топтар елдің солтүстік-батысы мен орталық аймақтарында да әрекет етеді.
Бұл шабуыл Нигерияның келесі жылы өтетін сайлауға дайындалып жатқан кезінде орын алды. Қауіпсіздік мәселесі саяси пікірталастарда маңызды орын алады деп күтілуде.