قازاقستان پارلامەنتى ءماجىلىسىنىڭ بۇرىنعى سپيكەرى نۇرلان نيگماتۋليننىڭ ۇلدارى ەندى جاڭاجول فوسفور زاۋىتىنىڭ يەلەرى ەمەس. نۇرحان مەن نۇرجان نۇرلانوۆتار زاۋىتتىڭ 100% اكسياسىنا يە كومپانيا KazChemicals Limited اكسيونەرلەرىنەن تولىعىمەن شىقتى، دەپ حابارلايدى infohub.kz.
مامىلە ناتيجەسىندە اعايىندىلاردىڭ بارلىق ۇلەستەرى ماجوريتارلىق اكسيونەر — Kazakhmys Resources B.V. كومپانياسىنا ءوتتى. بۇل كومپانيا، بەلگىلى مالىمەتتەرگە سايكەس، قازاقستاندىق تانىمال كاسىپكەر ۆلاديمير كيمگە تيەسىلى. وسىلايشا، ۇلەستەردى وسى قۇرىلىمنىڭ پايداسىنا شوعىرلاندىرۋ پروسەسى اياقتالدى.
رەسمي حابارلامادا وزگەرىستەردىڭ تەك كورپوراتيۆتىك سيپاتتا ەكەنى جانە زاۋىتتىڭ وپەراسيالىق قىزمەتىنە اسەر ەتپەيتىنى اتاپ ءوتىلدى. قۇقىقتاردى بەرۋدى رەسىمدەۋ بويىنشا بارلىق پروسەدۋرالار زاڭناماعا قاتاڭ سايكەس جۇرگىزىلدى.
ايتا كەتۋ كەرەك، نۇرحان مەن نۇرجان نۇرلانوۆتار ءىس جۇزىندە 2023 جىلدىڭ سوڭىندا-اق كومپانيانى باسقارۋدان قول ۇزگەن بولاتىن. ولار ستراتەگيالىق جانە وپەراسيالىق شەشىمدەر قابىلداۋعا قاتىسپاعان، سونداي-اق اعىمداعى باسشىلىق فۋنكسيالارىن دا اتقارماعان.
ەسكە سالايىق، جاڭاجول فوسفور زاۋىتىنىڭ باس قۇرىلىمى «استانا» حالىقارالىق قارجى ورتالىعىندا تىركەلگەن KAZ Chemicals كومپانياسى بولىپ تابىلادى. 2025 جىلى تۇپكىلىكتى باقىلاۋشى تۇلعا ۆلاديمير كيم بولعان، ال بۇرىنعى سپيكەردىڭ ۇلدارى قۇرىلتايشىلار قاتارىندا تۇرعان.
بۇعان دەيىن نۇرلانوۆتار، كيم جانە رەسەيلىك اكسيونەرلەرمەن بايلانىستى تاعى ءبىر فوسفور كاسىپورنى — «قازفوسفات» — 14،65 ملرد تەڭگە كولەمىندە شىعىنعا ۇشىراعانى حابارلانعان بولاتىن.