نيرمال پۋرجا باستاعان حالىقارالىق الپينيستەر توبى پاكيستانداعى بروۋد-پيكتە بولعان كوشكىننەن كەيىن حابار-وشارسىز كەتتى، دەپ حابارلايدى infohub.kz.
بريتان ارمياسىنىڭ بۇرىنعى تەڭىز جاياۋ اسكەرى، نەپالدىق نيرمال پۋرجا جەتەكشىلىك ەتەتىن ون ادامنان تۇراتىن توپ قاراقورام جوتاسىنداعى بيىكتىگى 8047 مەتر بولاتىن وسى شىڭدى باعىندىرۋ كەزىندە كوشكىنگە ۇشىراعان. پاكيستان الپينيستەر قاۋىمداستىعىنىڭ مالىمەتىنشە، كوشكىن بەيسەنبى كۇنى ءتۇس كەزىندە بولعان. سودان بەرى توپپەن بايلانىس ورناتىلماعان.
الپينيستەر قۇرامىندا ءبىر امەريكالىق، ءبىر قىتايلىق، ءبىر وماندىق جانە بەس نەپالدىق بار ەكەنى حابارلاندى. ەكسپەديسيا جەتەكشىسى پۋرجا 2019 جىلى الەمنىڭ 8000 مەتردەن اساتىن 14 شىڭىنىڭ بارلىعىن التى ايدان ءسال استام ۋاقىتتا باعىندىرىپ، تانىمال بولعان.
پاكيستان ءالپى كلۋبىنىڭ ۆيسە-پرەزيدەنتى كاررار ءحايدريدىڭ بي-بي-سيگە ايتۋىنشا، قۇتقارۋ جۇمىستارىن جۇرگىزۋ ءۇشىن جۇما كۇنى تاڭەرتەڭ پاكيستان ۋاقىتى بويىنشا تىكۇشاق جىبەرۋ جوسپارلانىپ وتىر، ءبىراق بۇل اۋا رايى جاعدايىنا بايلانىستى.
بروۋد-پيك الەمدەگى ەڭ بيىك 12ء-شى شىڭ سانالادى جانە ەكسپەديسيالار ءۇشىن ەڭ قيىن شىڭداردىڭ ءبىرى رەتىندە بەلگىلى. پاكيستان ءالپى كلۋبى بولەك مالىمدەمەدە بيلىكپەن ۇنەمى بايلانىستا ەكەنىن جانە بارلىق قولجەتىمدى رەسۋرستاردى جۇمىلدىرۋعا كۇش سالىپ جاتقانىن جەتكىزدى. كلۋب الپينيستەردىڭ اماندىعى مەن ءساتتى قۇتقارىلۋى ءۇشىن دۇعا ەتىپ، ولاردىڭ وتباسىلارى مەن حالىقارالىق ءالپى قاۋىمداستىعىمەن بىرگە ەكەنىن ءبىلدىردى.
پۋرجا 2003 جىلى بريتان ارمياسىنا قوسىلىپ، 2009 جىلى تەڭىز جاياۋ اسكەرى اتانعان. ونىڭ الپينيزمدەگى مانسابى 2012 جىلى ەۆەرەست بازالىق لاگەرىنە جاياۋ بارعان كەزدە باستالىپ، جوسپار بويىنشا قايتۋدىڭ ورنىنا، ول تۇتاس شىڭدى باعىندىرۋدى ۇيعارعان.