قۇتقارۋشىلار بريتاندىق-نەپالدىق الپينيست نيرمال پۋردجانىڭ دەنەسىن پاكىستانداعى بروۋد-پيك تاۋىنان كوشكىننەن كەيىن تاپتى، دەپ حابارلايدى infohub.kz سايتى.
تانىمال ءالپينيستىڭ دەنەسى شامامەن 5700 مەتر بيىكتىكتەن تابىلدى. بۇل اقپاراتتى پاكىستاننىڭ الپكلۋبى راستادى. ۇيىمنىڭ مالىمەتىنشە، قۇتقارۋشىلار تاعى ءۇش دەنەنى بايقاعان، ولاردىڭ كىم ەكەنى ازىرگە انىقتالماعان. سۇيەكتەردى جاپونيانىڭ بازالىق لاگەرىنە جەتكىزۋ جوسپارلانۋدا.
بۇعان دەيىن پاكىستان بيلىگى ەكسپەديسيانىڭ تاعى ءۇش مۇشەسىنىڭ دەنەلەرى تابىلعانىن راستاعان بولاتىن: امەريكالىق مەللوري گەيس، ومان ازاماتى نادحيرا احمەد ابدۋللا ال حارتي جانە نەپالدىق الپينيست پۋرا باحادۋر گۋرۋنگ.
نەپال پرەمەر-مينيسترى بالەندرا شاح كوڭىل ايتتى: «الەمدىك رەكوردشى نيرمال پۋردجانى قوسا العاندا، التى نەپالدىق جانە ءتورت شەتەلدىك ءالپينيستىڭ قايعىلى قازاسى ءبىزدى ءدۇر سىلكىندىردى. ولاردىڭ ەرلىگى مەن ىسىنە ادالدىعى ءارقاشان شابىتتاندىرادى».
پۋردجا 2019 جىلى الەمگە ايگىلى بولدى، بارلىق 14 سەگىز مىڭدىق شىڭدى نەبارى 189 كۇندە باعىندىردى. كەيىن ونىڭ تاريحى Netflixء-تىڭ «14 Peaks: Nothing Is Impossible» دەرەكتى فيلمىنە نەگىز بولدى.
بۇعان دەيىن حالىقارالىق الپينيستەر توبى بروۋد-پيك تاۋىندا كوشكىننەن كەيىن حابارسىز كەتكەنى حابارلانعان بولاتىن. توپتى تانىمال بلوگەر نيرمال پۋردجا باسقارعان.