انگليانىڭ سۋففولك گرافتىعىندا حابارسىز كەتكەن ءۇش جاسار نوا ۆۋدستىڭ دەنەسى تابىلعان سوڭ، فۋتبولشىلار مەن جانكۇيەرلەر ونى ەسكە الۋ ءراسىمىن وتكىزدى، دەپ حابارلايدى infohub.kz سايتى.
سەنبى كۇنى «ەۆەرتون» ءوز الاڭىندا «يپسۆيچ تاۋنمەن» وتكىزگەن پرەمەر-ليگا ماچىندا ويىنشىلار قارا ءتۇستى بەلگىلەر تاعىپ شىقتى. ليۆەرپۋلدەگى ويىن الدىندا ۇلكەن ەكراندا بالانىڭ سۋرەتى كورسەتىلىپ، دوپ تەپكەننەن كەيىن ءۇش مينۋت وتكەندە ەكى كوماندانىڭ جانكۇيەرلەرى دە ورنىنان تۇرىپ، نوانى ءبىر مينۋت ۇنسىزدىكپەن ەسكە الدى.
سۋففولك پوليسياسىنىڭ مالىمەتىنشە، سويلەي المايتىن، قۇلاعى ناشار ەستيتىن جانە اۋتيزمگە تەكسەرىلىپ جاتقان بالا سەيسەنبى كۇنى تۇستەن كەيىن برەنتەمدەگى ويىن الاڭىنا بارعاننان كەيىن تۋىسىنان ءبولىنىپ قالعان. شامامەن 1300 ادام قاتىسقان ىزدەۋ جۇمىستارى سارسەنبىدە پوليسيا سۇڭگۋىرلەرىنىڭ جاقىن ماڭداعى كولدەن دەنە تابۋىمەن اياقتالدى.
بەيسەنبى كۇنى نوانىڭ اكەسى ريس ۆۋدس قاۋىمداستىقتىڭ Facebook توبىندا جازبا جاريالاپ، ۇلىنا دەگەن قۇرمەتىن ءبىلدىردى. ول بىلاي دەپ جازدى: «بۇل قايعىنى سوزبەن جەتكىزۋ مۇمكىن ەمەس، ءبارىمىزدىڭ جۇرەگىمىز قان جىلاپ تۇر. نوا — ەڭ ءتاتتى ءارى ەڭ پاك بالا ەدى، ول تەك سۇيىسپەنشىلىككە تولى بولاتىن، ونى قاتتى ساعىنامىز».
سەنبى كۇنى تۇستەن كەيىن «ەۆەرتوننىڭ» حيلل ديكينسون ستاديونىنىڭ ۇلكەن ەكرانىندا نوا ۆۋدستىڭ سۋرەتى كورسەتىلدى.
«يپسۆيچ تاۋن» كلۋبىنىڭ كاپيتانى دارا و'شي مەن قاقپاشى كريستيان ۋولتون باستاعان دەلەگاسيا بالا جوعالعان ويىن الاڭىنا گۇل شوقتارىن قويدى. «تاۋن» قورعاۋشىسى ليف دەۆيس ەسسەكس گرافتىعىنداعى كولچەستەر قالاسىنداعى اكەلەر توبى «Good Dads Club» ۇيىمداستىرعان قارجى جيناۋ ناۋقانىنا 2000 فۋنت ستەرلينگ اۋداردى. سەنبى كۇنى كەشكە قاراي ناۋقانعا 6000-نان استام قولداۋشى 100 000 فۋنت ستەرلينگتەن استام قاراجات جيناپ ۇلگەرگەن.
سۋففولك پوليسياسى بالانىڭ ءولىمى كۇدىكتى جاعداي رەتىندە قاراستىرىلمايتىنىن، الايدا تەرگەۋ قورىتىندىسىن كورونەرگە جىبەرمەس بۇرىن ءبىرقاتار تەكسەرۋ جۇمىستارىن اياقتاۋ قاجەتتىگىن مالىمدەدى.