كەنيادان شىققان، قازاقستان اتىنان سىنعا تۇسكەن جەڭىل اتلەت نورا دجەرۋتو جاپونيادا ءوتىپ جاتقان ازيا ويىندارىندا 5000 مەترگە جۇگىرۋدە بەسىنشى ورىن الدى. ال ءبىر كۇن بۇرىن ول ءوزىنىڭ باستى ديستانسياسى – 3000 مەترگە كەدەرگىلەردەن جۇگىرۋدە كۇمىس جۇلدە جەڭىپ العان بولاتىن، دەپ حابارلايدى infohub.kz سايتى.
دجەرۋتومەن بىرگە 5 شاقىرىمدى قۇراماداعى قۇربىسى دەيسي دجەپكەمەي دە جۇگىردى. ول بۇعان دەيىن 10 000 مەتردە ءتورتىنشى بولىپ مارەگە جەتكەن ەدى. قازاقستاندىقتار العاشقى مەترلەردەن-اق العا ۇمتىلىپ، كوماندالىق تاكتيكا قولدانۋعا تىرىستى. الايدا قارسىلاستار قۋىپ جەتتى. سودان كەيىن دەيسي ءسال قالىپ قويدى دا، نورا جالعىز ءوزى جۇلدە ءۇشىن كۇرەستى جالعاستىردى.
ءبىزدىڭ سپورتشى سوڭعى اينالىمعا دەيىن كوش باستاپ كەلدى. كەيىن باحرەيننەن ۋينفرەد ياۆي مەن جاپونيالىق نوزومي تاناكا العا وزدى. ولار التىن مەن كۇمىستى ءوزارا ءبولىستى.
مارەنى باسىنان باستاپ باستاپ كەلگەن دجەرۋتوعا فينيشتە كۇش جەتپەدى. ول – بەسىنشى، دجەپكەمەي – جەتىنشى.
ازيا ويىندارى-2026
28 قىركۇيەك. 5000 مەتر. ايەلدەر
🥇 1. ۋينفرەد ياۆي (باحرەين) – 15.10،18
🥈 2. نوزومي تاناكا (جاپونيا) – 15.11،65
🥉 3. پارۋل چاۋدحاري (ءۇندىستان) – 15.14،61
…5. نورا دجەرۋتو (قازاقستان) – 15.18،21
…7. دەيسي دجەپكەمەي (قازاقستان) – 15.37،89
2022 جىلى وسى ديستانسيادا قولا جۇلدەنى تاعى ءبىر ناتۋراليزاسيالانعان سپورتشى كارولين چەپكوەچ كيپكيرۋي جەڭىپ العان ەدى.
جازعى ازيا ويىندارى رەسمي تۇردە 19 قىركۇيەكتە اشىلىپ، 4 قازاندا مارەسىنە جەتەدى. 45 ەلدىڭ سپورتشىلارى قاتىساتىن جارىستاردا 460 مەدال جيىنتىعى ساراپقا سالىنۋدا. ازيادا-2026-دا قازاقستان قۇراماسىنىڭ قۇرامىندا 35 سپورت تۇرىنەن 558 سپورتشى سىنعا تۇسۋدە.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ويىندار چەمپيوندارى اتانعاندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتەشىلەر جولامان بيگابىل مەن سوفيا بەرۋلسەۆا. قۇراما قورجىنىنا بەسىنشى التىندى مما سايىسكەرى ەركىنعالي بۇركىتالين سالدى. التىنشىسىن – ونىڭ ارالاس جەكپە-جەكتەگى كوماندالاسى قادىربەك شىنبايەۆ قوستى. 23 قىركۇيەكتە لۋسەنكو اي-2026-نىڭ ەكى دۇركىن چەمپيونى اتاندى. سەگىزىنشى جوعارى سىناقتاعى مەدالدى 24 قىركۇيەكتە ەسكەكشىلەر ۆلاديسلاۆ ياكوۆليەۆ پەن يۆان چەرنۋحين ەرلەر اراسىنداعى جۇپتىق ەسۋ سايىسىندا جەڭىپ الدى. توعىزىنشى التىن مەدالدى ءبىزدىڭ شپاگاشىلار كومانداسى يەلەندى.
ياسمينا توقسانباەۆا جەڭىپ العان مارافوندىق جۇرىستەگى التىن قىتايعا بەرىلدى – قازاقستاندىق سپورتشىنىڭ سپورتتىق اياق كيىمىنە قاتىستى نارازىلىق قاناعاتتاندىرىلدى.
ويىنداردىڭ سەگىز كۇنىنەن كەيىن قازاقستان بەيرەسمي مەدال ەسەبىندە بەسىنشى ورىندا تۇردى.