نورۆەگيا بيلىگى شپيسبەرگەن ارحيپەلاگىنداعى رەسەيلىك كەمەنى ۋكراينانىڭ «نافتوگاز» كومپانياسىنىڭ ءوتىنىشى بويىنشا تاركىلەدى. بۇل — رەسەيدىڭ قىرىمدى زاڭسىز اننەكسيالاۋى مەن ۋكرايندىق ەنەرگەتيكالىق اكتيۆتەردى، ونىڭ ىشىندە گاز كەن ورىندارى مەن قۇبىرلاردى تارتىپ الۋىنا بايلانىستى بەرىلگەن 4،22 ميلليارد دوللارلىق تورەلىك شەشىمدى ورىنداتۋ جولىنداعى جاھاندىق كۇش-جىگەردىڭ ءبىر بولىگى، دەپ حابارلايدى infohub.kz سايتى.
2023 جىلى گااگاداعى تورەلىك سوت رەسەيدى ۋكراينانىڭ مەملەكەتتىك ەنەرگەتيكالىق كومپانياسىنىڭ قىرىمداعى اكتيۆتەرىن زاڭسىز تارتىپ الۋى ءۇشىن 4،22 ميلليارد دوللار تولەۋگە مىندەتتەگەن بولاتىن. رەسەي بۇل سومانى تولەۋدەن باس تارتقان سوڭ، «نافتوگاز» الەمنىڭ ءتۇرلى ەلدەرىندەگى سوتتارعا رەسەيدىڭ كوممەرسيالىق اكتيۆتەرىن تاركىلەۋ تۋرالى وتىنىشتەر جولداپ كەلەدى.
«نافتوگاز» باس ديرەكتورى سەرگەي فەدورەنكونىڭ ايتۋىنشا، بۇل — رەسەيدىڭ قىرىمداعى «نافتوگاز» اكتيۆتەرىن زاڭسىز تارتىپ الۋىنا بايلانىستى ادىلەتتىلىكتى قالپىنا كەلتىرۋ جولىنداعى تاعى ءبىر ماڭىزدى قادام. ول رەسەيدىڭ حالىقارالىق تورەلىك شەشىمدى ورىنداۋدان باس تارتۋ ارقىلى جاۋاپكەرشىلىكتەن قۇتىلا المايتىنىن، كومپانيانىڭ رەسەيلىك اكتيۆتەردى الەم بويىنشا ىزدەۋدى جالعاستىراتىنىن اتاپ ءوتتى.
نورۆەگيانىڭ «پروفەسسور مولچانوۆ» كەمەسىن تاركىلەۋى سولتۇستىك-ترومس اۋداندىق سوتىنىڭ 31 تامىزداعى شەشىمىنە نەگىزدەلگەن. شپيسبەرگەن گۋبەرناتورى لارس فاۋستىڭ مالىمدەۋىنشە، كەمەگە شپيسبەرگەندەگى بارەنسبۋرگ قالاسىنداعى قازىرگى تۇراعىن تاستاپ كەتۋگە تىيىم سالىنعان. بۇل رەسەيلىك كەمە كوممەرسيالىق ەكسپەديسيالىق كرۋيزدەرگە، سونىڭ ىشىندە شپيسبەرگەنگە ساپارلارعا پايدالانىلادى.