راقاتسىز وتسە دە ءومىر جاسىم،
بۇل ءجونىمنان قۇدايىم ايىرماسىن.
ۇزاق جولعا نيەت قىپ ءبىر شىققان سوڭ،
جارىم جولدان قايتپاسپىن، قارىنداسىم!
سۋ دا بولار ول جولدا، تاۋ دا بولار،
جاۋدىڭ وعى، جايعان تور، اۋ دا بولار.
مىناۋ پايدا،مىناسى زيان دەمەك،
ول ەرلىكتىڭ ءىسى ەمەس، ساۋدا بولار.
شالدىعاتىن، شارشايتىن جەرلەر دە بار،
شالدىققانعا مۇقالماس ەرلەر دە بار.
قايراتانىپ، قاجىماي تىرمىسساڭ دا،
شىققىزبايتىن جولىڭدى ەرلەر دە بار.
شارشايدى دەپ ويلاما شالدىققانان،
ۇزاقسىنىپ جاتپاسپىن جالىققاننان.
جۇرت، قولىمنان كەلمەسە، وكپەلەمەس،
بارىن ساقتاپ، مەن اياپ، الىپ قالمان.
ەل مۇنىمدى بىلەمىن ۇقپايتىنىن،
كوتەرمەگە تالعاندا شىقپايتىنىن،
شالىس باسىپ اياقتى، جىعىلعاندا،
«جاتقانىڭنان تۇرما!» دەپ مىقتايتىنىن.
مەن ولسەم دە ولەمىن جونىممەنەن،
توننەن باسقا نەمدى الار ءولىم مەنەن؟!
ولگەن كۇنى اپارىپ تىعارى - كور،
مەن جوق بولمان كومىلىپ تانىممەنەن.
ءتان كومىلەر، كومىلمەس ەتكەن ءىسىم،
ويلايتىنداي مەن ەمەس ءبىر كۇنگىسىن.
جۇرت ۇقپاسا، ۇقپاسىن، جابىقپايمىن،
ەل بۇگىنشىل، مەنىكى ەرتەڭگى ءۇشىن.

---