قىتايدىڭ وڭتۇستىگىندە نۇل تايفۋنى سوققىسىنان جۇزدەگەن مىڭ ادام ءقاۋىپسىز جەرگە كوشىرىلدى. بۇل تۋرالى infohub.kz حابارلايدى.
نۇل تايفۋنى گۋاندۋن پروۆينسياسىنىڭ وڭتۇستىگى مەن كورشىلەس گونكونگكە قاتتى جەل مەن نوسەر اكەلدى. ۇلتتىق اۋا رايى ورتالىعىنىڭ مالىمەتىنشە، تايفۋن جەكسەنبى كۇنى جەرگىلىكتى ۋاقىتپەن 03:50-دە (سەنبى كۇنى گرينۆيچ بويىنشا 19:50) گۋاندۋننىڭ حۋيچجوۋ قالاسىنداعى حۋيدونگ اۋدانىنىڭ جاعالاۋىنا جەتكەن.
سينحۋا اگەنتتىگىنىڭ حابارلاۋىنشا، نۇل – بيىل قىتايعا كەلگەن ەڭ كۇشتى تايفۋن. گونكونگ وبسەرۆاتورياسىنىڭ دەرەگىنشە، ونىڭ ورتاسىنداعى جەلدىڭ تۇراقتى جىلدامدىعى ساعاتىنا 110 كم (ساعاتىنا 68 ميل) بولعان. تايفۋن جەكسەنبى كۇنى ىشكى گۋاندۋنعا قاراي جىلجىپ، السىرەپ بارادى، ءبىراق ايماقتىڭ كەي جەرلەرىنە ءالى دە قاتتى جەل مەن جاڭبىر اكەلۋدە.
مەملەكەتتىك جۇڭگو ۇلتتىق راديوسىنىڭ مالىمەتىنشە، جەكسەنبى كۇنى تاڭەرتەڭ گۋاندۋندا 715 مىڭنان استام ادام ءقاۋىپسىز جەرگە كوشىرىلگەن. سەنبى كۇنى 340 مىڭعا جۋىق ادام ەۆاكۋاسيالانعانى حابارلانعان.
ۇلتتىق مەتەورولوگيالىق ورتالىق دەمالىس كۇندەرى گۋاندۋننىڭ وڭتۇستىگى مەن فۋسزيان پروۆينسياسىنىڭ وڭتۇستىك-شىعىسىندا قاتتى جاڭبىر مەن جەل بولاتىنىن بولجاعان.
CCTV تەلەارناسىنىڭ حابارلاۋىنشا، گۋاندۋننىڭ جاعالاۋىنداعى حۋيلاي اۋدانىندا كوپتەگەن اعاشتىڭ تامىرىمەن ج ۇلىنعانى بايقالعان. گونكونگ اۋەجاي باسقارماسى جەكسەنبى كۇنى 350-گە جۋىق رەيستىڭ توقتاتىلعانىن مالىمدەگەن. گونكونگ بيلىگىنىڭ ايتۋىنشا، تايفۋن كەزىندە قالادا كەم دەگەندە توعىز ادام جاراقات العان.
نۇل گونكونگقا جاقىنداعاندا، سەنبى كۇنى تۇستەن كەيىن بيىك عيماراتتاعى ۇلكەن تىرەۋىش قۇرىلىمىنىڭ ءبىر بولىگى قۇلاپ تۇسكەن. پوليسيانىڭ العاشقى مالىمەتىنشە، زارداپ شەككەندەر جوق.
تايۆان ورتالىق اۋا رايى باسقارماسى نۇلدىڭ تايۆاننىڭ وڭتۇستىگى مەن شىعىسىنا جاڭبىر اكەلگەنىن حابارلاعان. تايفۋن تايۆاننىڭ وڭتۇستىگىندەگى سۋلاردى باسىپ ءوتىپ، سەنبى كۇنى ارالدان الىستاعان.
وسى ايدىڭ باسىندا باۆي تايفۋنى قىتايدىڭ شىعىسىنا قاتتى جەل مەن جاڭبىر اكەلىپ، ەكى ميلليوننان استام ادام ەۆاكۋاسيالانعان ەدى. ول 11 شىلدەدە جەرگە تۇسكەن. ال مايساك تايفۋنى 3 شىلدەدە قىتايدىڭ وڭتۇستىگىنە سوققان.