نۇراي سەرىكبايدىڭ ولىمىنە قاتىستى ىستە جاڭا سوت تالقىلاۋى بولادى. ءومىر بويى باس بوستاندىعىنان ايىرۋعا سوتتالعان شەرحان ايماحاننىڭ قورعاۋشىلارى اپەللياسيالىق شاعىم بەردى، دەپ حابارلايدى infohub.kz.
بۇل تۋرالى جابىرلەنۋشى تاراپتىڭ ادۆوكاتى ايانحان وماروۆ مالىمدەدى. ونىڭ ايتۋىنشا، ەندى ءىستى اپەللياسيالىق ساتىداعى سوت قاراۋى ءتيىس.
«نۇرايدىڭ ءىسى بويىنشا سوتتالعان ايماحان شەرحاننىڭ قورعاۋشىلارى اپەللياسيالىق شاعىم بەردى. مەن ونى زەردەلەپ، قارسى پىكىر دايىندايمىن. ەندى ءىس اپەللياسيالىق ساتىداعى سوتتا قارالاتىن بولادى»، — دەدى وماروۆ Threads-تە.
قورعاۋشىلاردىڭ شاعىمدا قانداي دالەلدەر كەلتىرگەنى جانە اپەللياسيادا نەگە قول جەتكىزگىسى كەلەتىنى تۋرالى جابىرلەنۋشى تاراپتىڭ ادۆوكاتى ازىرگە ناقتىلاعان جوق.
ەسكە سالايىق، قايعىلى وقيعا 2026 جىلدىڭ 11 قاڭتارىندا شىمكەنتتە بولعان. تەرگەۋ دەرەكتەرى بويىنشا، بۇرىن قىزبەن تانىس بولعان 28 جاستاعى ايماحان نۇراي سەرىكبايدى دۇكەن ماڭىندا كۇتىپ تۇرىپ، وعان بىرنەشە ولىمگە اكەلەتىن پىشاق جاراقاتىن سالعان.
قىلمىس جاساعاننان كەيىن شابۋىلداۋشى جاسىرىنۋعا تىرىسقان، الايدا كوپ ۇزاماي قالادان شامامەن 10 كم قاشىقتىقتا ۇستالىپ، تەرگەۋ يزولياتورىنا قامالعان.
شەرحان ايماحان بۇعان دەيىن 21 جاستاعى نۇراي سەرىكبايدى ولتىرگەنى ءۇشىن كىنالى دەپ تانىلىپ، ءومىر بويى باس بوستاندىعىنان ايىرۋعا سوتتالعان. ەندى وعان شىعارىلعان ۇكىم اپەللياسيالىق ساتىدا تەكسەرىلەتىن بولادى.