شىمكەنتتەگى 21 جاستاعى ستۋدەنت نۇراي سەرىكبايدىڭ ولتىرىلۋىنە قاتىستى سوت پروسەسى 21 شىلدەدە باستالادى. بۇل تۋرالى ادۆوكات ايانحان وماروۆ infohub.kz سايتىنا حابارلادى.
قورعاۋشىنىڭ ايتۋىنشا، الدىن الا وتىرىستا ءىستى سۋديا نەمەسە القابيلەر القاسى قارايتىنى شەشىلەدى. سونداي-اق مەملەكەتتىك ايىپتاۋشى (پروكۋرور) انىقتالىپ، كەلەسى تىڭداۋدىڭ كۇنى بەلگىلەنەدى. سونىمەن قاتار، پروسەسس فورماتى: اشىق، جابىق نەمەسە ونلاين-ترانسلياسيا مۇمكىندىگىمەن وتەتىنى ايقىندالادى.
قايعىلى وقيعا 2026 جىلعى 11 قاڭتار كەشكە شىمكەنتتە بولعان. نۇراي ۇيىنەن شىعىپ، ونىڭ سوڭىنا ءبىر ەر ادام تۇسكەن. قىز قاشۋعا تىرىسقانىمەن، كۇدىكتى ونى قۋىپ جەتىپ، بىرنەشە رەت پىشاقتاپ، وقيعا ورنىندا كوز جۇمدى. كۇدىكتى ونىڭ تانىسى بولىپ شىقتى.
قىزى قايتىس بولعاننان كەيىن وتباسى كۇدىكتىنىڭ نۇرايدى ۇزاق ۋاقىت قۋدالاپ، قورقىتقانىن ايتتى. قىز پوليسياعا ارىزدانعان، ءبىراق تۋعاندارىنىڭ سوزىنە قاراعاندا، ءتيىستى شارا قولدانىلماعان.
وقيعادان كەيىن پرەزيدەنت قاسىم-جومارت توقايەۆ شىمكەنت قالالىق پوليسيا دەپارتامەنتىنىڭ ىس-ارەكەتىنە تەكسەرۋ جۇرگىزۋدى تاپسىردى. ناتيجەسىندە شىمكەنت قالالىق پد باسشىسى مەن ونىڭ ءبىرىنشى ورىنباسارى قىزمەتىنەن بوساتىلدى.