الماتى وبلىسىندا اكتەر ءارى بلوگەر نۇرسۇلتان جاقسىگەنگە ۇكىم شىقتى — ول 2 جىل 3 ايعا باس بوستاندىعىنان ايىرىلدى. قىلمىستىق ءىس ونىڭ بۇرىنعى ازاماتتىق نەكەدەگى جۇبايىمەن جانجالىنا قاتىستى، دەپ حابارلايدى infohub.kz سايتى.
الماتى وبلىسى سوتتارىنىڭ رەسمي Telegram-ارناسىندا جازىلعانداي، قاراساي اۋداندىق سوتى قىلمىستىق كودەكستىڭ 274-بابى 2-بولىگىنىڭ 3-تارماعى بويىنشا — بۇقارالىق اقپارات قۇرالدارىن، تەلەكوممۋنيكاسيا جەلىلەرىن جانە ونلاين-پلاتفورمالاردى پايدالانىپ، كورىنەۋ جالعان اقپارات تاراتۋ دەرەگى بويىنشا قىلمىستىق ءىستى قارادى.
قىلمىستىق ءىس ماتەريالدارىنا سايكەس، سوتتالۋشى مەن جابىرلەنۋشى ازاماتتىق نەكەدە تۇرعان جانە ەكى كامەلەتكە تولماعان ورتاق بالاسى بار. 2024 جىلعى 14 ساۋىردە ولار بىرگە تۇرۋدى توقتاتقان.
قىلمىستىق قۋدالاۋ ورگانى ەر ادامدى الەۋمەتتىك جەلىلەردە جابىرلەنۋشىنىڭ يمانسىز مىنەز-قۇلقى تۋرالى كورىنەۋ جالعان مالىمەتتەر تاراتىپ، ونىڭ ار-نامىسى مەن قادىر-قاسيەتىنە نۇقسان كەلتىردى دەپ ايىپتادى.
سوت سوتتالۋشىنىڭ جابىرلەنۋشىنىڭ قۇقىقتارى مەن زاڭدى مۇددەلەرىنە ەلەۋلى زيان كەلتىرگەن كورىنەۋ جالعان اقپارات تاراتقانىن دالەلدەندى دەپ تانىدى. بلوگەر كىنالى دەپ تانىلىپ، وعان 2 جىل 3 ايعا باس بوستاندىعىنان ايىرۋ جازاسى تاعايىندالدى. جازا ورتاشا قاۋىپسىزدىكتەگى قىلمىستىق-اتقارۋ جۇيەسى مەكەمەلەرىندە وتەلۋگە ءتيىس.
سونىمەن قاتار، قىلمىستىق كودەكستىڭ 50-بابىنىڭ 3-بولىگىنە سايكەس، ول 5 جىل مەرزىمگە جۋرناليستىك، بلوگەرلىك جانە بۇقارالىق اقپارات قۇرالدارىندا، ونلاين-پلاتفورمالاردا، الەۋمەتتىك جەلىلەردە جانە وزگە دە تەلەكوممۋنيكاسيالىق جەلىلەردە انىقتالماعان تۇلعالار توبىنا ارنالعان اقپاراتتى دايىنداۋ، ورنالاستىرۋ جانە تاراتۋمەن بايلانىستى وزگە دە پۋبليسيستيكالىق اقپاراتتىق قىزمەتپەن اينالىسۋ قۇقىعىنان ايىرىلدى.
سوت سوتتالۋشىدان جابىرلەنۋشىنىڭ پايداسىنا 5 ملن تەڭگە مورالدىق زيان وتەماقىسىن ءوندىرىپ الدى.
ۇكىم زاڭدى كۇشىنە ەنگەن جوق.
نۇرسۇلتان جاقسىگەنگە ۇكىم شىعارىلعانى تۋرالى جابىرلەنۋشى تاراپتىڭ ادۆوكاتى دا حابارلادى.