نيۋ-يورك پورتىندا قايىقتىڭ اۋدارىلۋى سالدارىنان ايەل مەن ونىڭ ءسابي قىزى قازا تاپقان وقيعاعا قاتىستى كاپيتان اقش-تىڭ يمميگراسيا جانە كەدەن قىزمەتى (ICE) تاراپىنان ۇستالدى. فەدەرالدىق اگەنتتىك ونى ەلدەن شىعارۋدى كوزدەپ وتىر.
قايعىلى وقيعا 8 تامىزدا ازاتتىق ءمۇسىنىنىڭ ماڭىندا بولدى. بيلىك وكىلدەرىنىڭ مالىمەتىنشە، ساعات 22:25 شاماسىندا 911 قىزمەتىنە قوڭىراۋ ءتۇسىپ، وقيعا ورنىنا بىرنەشە قايىق توبى، سۇڭگۋىرلەر توبى جانە تىكۇشاق جىبەرىلگەن.
قۇرباندار نيۋ-يورك پوليسيا دەپارتامەنتىنىڭ (NYPD) مالىمەتىنشە، 27 جاستاعى سارا سانچەس جانە ونىڭ بەس ايلىق قىزى انتونەللا بولىپ تانىلدى. ولار جەرگىلىكتى اۋرۋحانادا قايتىس بولدى.
قايىقتى باسقارعان 46 جاستاعى مانۋەل ەرنەستو ەرناندەس-ۋماناعا قاتىستى فەدەرالدىق ايىپتار قويىلدى. نيۋ-يورك بيلىگى ونى كەمە وفيسەرىنىڭ قاتەلىگى مەن نەمقۇرايلىعى سالدارىنان ەكى ادامنىڭ قازاسىنا سەبەپكەر بولدى دەپ ايىپتادى.
سارسەنبىدە ICEء-تىڭ جوعارى تۇرعان ۇيىمى — اقش ىشكى قاۋىپسىزدىك دەپارتامەنتى (DHS) اقش جاعالاۋ كۇزەتىنىڭ تەرگەۋى بارىسىندا ەرناندەستىڭ ەلدە زاڭسىز جۇرگەنى انىقتالعانىن جانە قىلمىستىق ءىس اياقتالعاننان كەيىن ونى ەلدەن شىعارۋ شارالارى قابىلداناتىنىن مالىمدەدى.
فەدەرالدىق بيلىك وكىلدەرىنىڭ ايتۋىنشا، ەرناندەس سالۆادوردان كەلگەن جانە 2007 جىلى مەكسيكادان تەحاسقا وتكەن كەزدە شەكارا پاترۋلىنە ءوزىن اقش ازاماتىمىن دەپ جالعان مالىمدەمە جاساعان.
«ول قىلمىستارى ءۇشىن جاۋاپ بەرگەننەن كەيىن، ونىڭ ەلىمىزدەن تەز ارادا شىعارىلۋىن قامتاماسىز ەتەمىز»، — دەدى DHS حاتشىسى ماركۋەين ماللين مالىمدەمەسىندە.
ەرناندەستىڭ ۇستالۋى ترامپ اكىمشىلىگىنىڭ يمميگراسياعا قاتىستى كەڭ اۋقىمدى شارالارىن كۇشەيتۋى اياسىندا بولىپ وتىر. سوڭعى ايلاردا فەدەرالدىق اگەنتتەر نيۋ-يورك پەن نيۋ-دجەرسي كوشەلەرىندە جۇزدەگەن يمميگرانتتى تۇتقىنداپ، نەگىزىنەن لاتىن امەريكاسى ەلدەرىنەن كەلگەن ادامداردى نىساناعا الدى. جالپى، ترامپ اكىمشىلىگى 2025 جىلدىڭ قاڭتارىنان بەرى 590 600-دەن استام ادامدى ەلدەن شىعارعان، دەپ حابارلادى وتكەن ايدا جاريالانعان دەرەكتەر.