نيۋ-يورك اسپانىندا قيراعان بۇكىلالەمدىك ساۋدا ورتالىعىنىڭ ەگىز مۇنارالارىنىڭ سۇلباسى قايتا جاڭعىردى: سارسەنبى كەشكە 2977 جارىق درون قاتىسقان ەستەلىك شوۋ ءوتىپ، 11 قىركۇيەك تەراكتىلەرىنىڭ 25 جىلدىعىنا ارنالدى، دەپ حابارلايدى infohub.kz سايتى.
بي-بي-سي ۇيىمداستىرۋشىلارعا سىلتەمە جاساپ حابارلاعانداي، ينستاللياسيا «نيۋ-يورك ايلاعى ۇستىندەگى 2977 وت» دەپ اتالدى. بۇل — 11 قىركۇيەك تەراكتىلەرىن باستان وتكەرگەن قاۋىمداستىقپەن، ياعني قازا تاپقانداردىڭ وتباسىلارىمەن، امان قالعاندارمەن جانە جەدەل قىزمەت قىزمەتكەرلەرىمەن بىرلەسىپ، سۋرەتشىلەر، پروديۋسەرلەر مەن قاۋىمداستىق وكىلدەرىنىڭ قاتىسۋىمەن جاسالعان كوپشىلىك كوركەم جوبا.
NDTV تەلەارناسىنىڭ دەرەگىنشە، 2977 درون گۋدزون وزەنىنىڭ ۇستىنەن كوتەرىلىپ، بىرتىندەپ جاقىنداي وتىرىپ، ەگىز مۇنارالاردىڭ كونتۋرىن تولىق ساۋلەتتىك اۋقىمدا قايتا جاسادى. ءاربىر وت 11 قىركۇيەكتە قازا تاپقانداردىڭ بىرەۋىن ءبىلدىردى. الدىمەن اپپاراتتار تۇنگى اسپانعا سپيرال بويىمەن كوتەرىلسە، كەيىن جويىلعان بۇكىلالەمدىك ساۋدا ورتالىعىنىڭ سۇلباسىنا ءتىزىلدى.
«„2977 وت“ جوباسىنىڭ ماقساتى — قازا تاپقانداردى جانە 11 قىركۇيەك وقيعالارىن ەسكە الۋ. ءبىز ءاربىر جەكە ءومىردى كۋالاندىرۋ ءۇشىن ءدال سونشا وت جاعامىز»، — دەدى جوبانىڭ كرەاتيۆتى ديرەكتورى ءارى اتقارۋشى پروديۋسەرى ەدديسون مەحر.
2001 جىلعى 11 قىركۇيەك تاڭىندا 19 تەرروريست-قاميقاشىق اقش-تا ءتورت جولاۋشى ۇشاعىن باسىپ الدى، ولاردىڭ ەكەۋى بۇكىلالەمدىك ساۋدا ورتالىعىنىڭ بيىك مۇنارالارىنا سوعىلدى. ءۇشىنشىسى پەنتاگون عيماراتىن تەسىپ ءوتتى، ءتورتىنشىسى پەنسيلۆانياداعى شانكسۆيلل قالاسىنىڭ ماڭىنا قۇلادى. 2977 ادام قازا تاپتى، تاعى 24 ادام ءىز-تۇزسىز جوعالدى.
ەسكە سالايىق، جاقىندا 11 قىركۇيەك تەراكتىلەرىنىڭ بولجامدى باس ۇيىمداستىرۋشىسى جانە گۋانتانامو بازاسىندا ۇستالىپ وتىرعان تاعى ءۇش سىبايلاسى 2028 جىلى سوت الدىنا شىعاتىنى بەلگىلى بولدى.