اقش ادىلەت مينيسترلىگىنىڭ مالىمەتىنشە، نيۋ-يوركتەگى ولباني قالاسىنىڭ 35 جاستاعى تۇرعىنى دجەسسيكا بوۋي شتات كاپيتوليىنە «يسلام مەملەكەتى» شابىتتاندىرعان شابۋىل جوسپارلادى دەگەن كۇدىكپەن ۇستالىپ، ايىپ تاعىلدى.
ۇلتتىق قاۋىپسىزدىك جونىندەگى باس پروكۋروردىڭ كومەكشىسى دجون ا. ايزەنبەرگتىڭ ايتۋىنشا، بوۋي كاپيتوليگە جارىلعىش قۇرىلعى ورناتىپ، مەملەكەتتىك قىزمەتكەرلەردى ءولتىرىپ، عيماراتتى مۇمكىندىگىنشە قيراتىپ، سودان كەيىن سيرياداعى «يسلام مەملەكەتى» باقىلايتىن اۋماققا قاشۋعا نيەتتەنگەن.
ادىلەت مينيسترلىگىنىڭ حابارلاۋىنشا، بوۋي سارسەنبى كۇنى ءوزى جارىلعىش قۇرىلعى دەپ ويلاعان زاتتى العاننان كەيىن قاماۋعا الىندى. ول بۇعان دەيىن كاپيتولي اۋماعىندا بايقالىپ، عيماراتتىڭ سۋرەتتەرىن تۇسىرگەن.
ادىلەت مينيسترلىگىنىڭ مالىمەتىنشە، بوۋي ءوز ماقساتىن سيپاتتاي كەلە، شابۋىلدىڭ «امەريكاندىق جۇيەگە اسەر ەتكەنىن» قالايتىنىن ايتقان. سونداي-اق ول 11 قىركۇيەكتەگى شابۋىلداردى ماداقتاپ، انتيامەريكاندىق حابارلامالار تاراتقان. ەسكە سالايىق، 11 قىركۇيەكتە ءال-قايدا سودىرلارى كوممەرسيالىق ۇشاقتاردى ۇرلاپ، ولاردى بۇكىلالەمدىك ساۋدا ورتالىعى مەن پەنتاگون عيماراتىنا، سونداي-اق پەنسيلۆانيا شتاتىنداعى شانكسۆيلل ماڭىنداعى الاڭعا قۇلاتقان بولاتىن.
ءبوۋيدىڭ ادۆوكاتىنا دەرەۋ تۇسىنىكتەمە الۋ مۇمكىن بولمادى.
بوۋي ۇستالعاننان كەيىن نيۋ-يورك گۋبەرناتورى كەتي حوكۋل شتات كاپيتوليىندە جانە جالپى ۇكىمەت عيماراتتارىندا قاۋىپسىزدىك شارالارىن كۇشەيتۋ تۋرالى شەشىم قابىلداعانىن، سەبەبى ساياسي زورلىق-زومبىلىق پەن مەملەكەتتىك قىزمەتكەرلەرگە ءقاۋىپ ءتوندىرۋ جاعدايلارى ارتقانىن مالىمدەدى. «قازىرگى ۋاقىتتا تىكەلەي ءقاۋىپ جوق، ءبىراق ءبىز نيۋ-يورك تۇرعىندارىن قورعاۋ جانە قاۋىمداستىقتارىمىزدىڭ قاۋىپسىزدىگىن قامتاماسىز ەتۋ ءۇشىن قۇقىق قورعاۋ ورگاندارىمەن تىعىز جۇمىس ىستەي بەرەمىز»، — دەدى ول مالىمدەمەسىندە.