رەسەيدە اسا ءقاۋىپتى ينفەكسياعا كۇدىك تۋرالى حابار تاراعان سوڭ قازاقستان دەنساۋلىق ساقتاۋ مينيسترلىگى قابىلدانعان الدىن الۋ شارالارى تۋرالى مالىمدەدى، دەپ حابارلايدى infohub.kz سايتى.
قازاقستان رەسپۋبليكاسى دەنساۋلىق ساقتاۋ مينيسترلىگىنىڭ سايتىنداعى اقپاراتقا سايكەس، ۆەدومستۆو يركۋتسك وبلىسىنداعى احۋالدى بەلسەندى باقىلاپ وتىر. قازاقستاندا بۇل ماسەلە تۇراقتى باقىلاۋدا، الدىن الۋ سيپاتىنداعى شارالار قابىلداندى.
«مەملەكەتتىك شەكارادان وتەتىن وتكىزۋ پۋنكتتەرىندە سانيتارلىق-كارانتيندىك باقىلاۋ جۇرگىزىلۋدە. بارلىق كولىك تۇرلەرىندە دەنە قىزۋى جوعارى، اۋرۋ بەلگىلەرى بار نەمەسە اسا ءقاۋىپتى ينفەكسياعا كۇدىكتى ادامدار انىقتالعان جوق. الدىن الا باعالاۋ بويىنشا، قازاقستانعا ينفەكسيا اكەلۋ ءقاۋپى تومەن كۇيىندە قالىپ وتىر. رەسمي اقپارات كەلىپ تۇسكەن سايىن احۋالعا بەرىلگەن باعا مەن قابىلدانىپ جاتقان شارالار ناقتىلاناتىن بولادى»، — دەپ ناقتىلادى مينيسترلىكتە.
قازاقستاندىقتارعا ەسكەرتۋ جاسالدى: ساپاردان كەيىن اۋرۋ بەلگىلەرى پايدا بولسا، دەر كەزىندە مەديسينالىق كومەككە جۇگىنىپ، دارىگەرگە بولعان جەرلەرى مەن ساپار كۇندەرىن ايتۋ قاجەت.
«قولدا بار دەرەكتەرگە قاراعاندا، قازىرگى تاڭدا رەسەيلىك ماماندار ەپيدەميولوگيالىق تەرگەۋ جۇرگىزىپ جاتىر. تۇپكىلىكتى دياگنوز ازىرگە رەسمي تۇردە راستالعان جوق، ىقتيمال جۇقپا كوزى مەن جاعدايى انىقتالۋدا. مەديسينالىق باقىلاۋدا 197 بايلانىستا بولعان ادام بار. قولدا بار دەرەكتەر بويىنشا، ولاردا اۋرۋ بەلگىلەرى انىقتالعان جوق، زەرتحانالىق زەرتتەۋ ناتيجەلەرى تەرىس. شەلەحوۆ اۋداندىق اۋرۋحاناسىندا قاجەتتى ەپيدەمياعا قارسى شارالار جۇرگىزىلۋدە»، — دەپ قوستى دەنساۋلىق ساقتاۋ مينيسترلىگىندە.
ۆەدومستۆودا اتاپ وتكەندەي، روسپوترەبنادزوردىڭ سوڭعى دەرەكتەرى بويىنشا يركۋتسك وبلىسىندا، يركۋتسكىدە جانە شەلەحوۆتە سانيتارلىق-ەپيدەميولوگيالىق احۋال تۇراقتى، وبا جاعدايلارى تىركەلگەن جوق. يركۋتسك وبلىسىندا 28 جاستاعى ايەلدىڭ ءولىمى ەتيولوگياسى انىقتالماعان پنەۆمونيا رەتىندە سيپاتتالۋدا.
ەسكە سالايىق، بۇعان دەيىن ب ا ق رەسەيدىڭ يركۋتسك وبلىسىندا وباعا قارسى ينستيتۋت قىزمەتكەرى وباعا كۇدىكپەن كوز جۇمعانىن حابارلاعان بولاتىن. مارقۇم دياگنوستيكا ءۇشىن بيوماتەريال جيناپ جاتقاندا زەرتحانادا ءقاۋىپتى باكتەريا سالىنعان پروبيركانى ابايسىزدا سىندىرىپ الدى دەپ بولجانعان.