قىركۇيەك ايىندا قازاقستاندا ودكب-نىڭ «رۋبەج-2026» وقۋ-جاتتىعۋى وتەدى، وسىعان بايلانىستى ءۇش ءوڭىردىڭ جولدارىندا اسكەري تەحنيكا قوزعالادى. ق ر قورعانىس مينيسترلىگى ازاماتتارعا تۇسىنىكتەمە بەردى، دەپ حابارلايدى infohub.kz سايتى.
قورعانىس ۆەدومستۆوسىنىڭ مالىمەتىنشە، 12-19 قىركۇيەك ارالىعىندا جەتىسۋ وبلىسىنداعى «كوكتال» پوليگونىندا ودكب-نىڭ «رۋبەج-2026» بىرلەسكەن وقۋ-جاتتىعۋى جوسپارلانعان. وسىعان بايلانىستى 7-30 قىركۇيەك ارالىعىندا الماتى جانە جامبىل وبلىستارىنىڭ، سونداي-اق جەتىسۋ وبلىسىنىڭ اۋماعىندا اسكەري تەحنيكا مەن جەكە قۇرامنىڭ جوسپارلى قوزعالىسى جۇزەگە اسىرىلادى.
وقۋ-جاتتىعۋ بارىسىندا دالالىق ساباقتار وتكىزىلەدى، ولاردىڭ اياسىندا اسكەرلەردى قايتا توپتاستىرۋ، بولىمشەلەردى باسقارۋ جانە قويىلعان مىندەتتەردى ورىنداۋ ماسەلەلەرى پىسىقتالادى. مۇنداي مانەۆرلەر تۇراقتى نەگىزدە جانە ودكب-عا مۇشە مەملەكەتتەردىڭ اۋماقتارىندا كەزەكپەن وتكىزىلەتىنى اتاپ ءوتىلدى.
«ازاماتتاردى، ب ا ق وكىلدەرىن جانە الەۋمەتتىك جەلى قولدانۋشىلارىن تەكسەرىلمەگەن اقپاراتتى تاراتپاۋعا جانە رەسمي كوزدەردە جاريالانعان مالىمەتتەردى باسشىلىققا الۋعا شاقىرامىز. قاساقانا جالعان اقپارات تاراتۋ، سونداي-اق راستالماعان دەرەكتەردى جاريالاۋ ق ر زاڭناماسىنا سايكەس جاۋاپكەرشىلىككە اكەپ سوعاتىنىن ەسكەرتەمىز»، — دەپ قوستى مينيسترلىكتە.