قازاقستاندا وكپە قاتەرلى ىسىگى تۋرالى حاباردارلىق اپتالىعى باستالدى. وسى اياسىندا 1600-دەن استام ادام تومەن دوزالى كومپيۋتەرلىك توموگرافيا ارقىلى تەگىن تەكسەرۋدەن وتە الادى. بۇل ءادىس اۋرۋدى ەرتە كەزەڭدە، ءتىپتى كىشكەنتاي وزگەرىستەردى دە انىقتاۋعا مۇمكىندىك بەرەدى. قازاقستان بۇل ءادىستى قولداناتىن ورتالىق ازياداعى العاشقى ەلدەردىڭ ءبىرى بولدى، دەپ حابارلايدى infohub.kz.
ەلىمىزدە جىل سايىن وكپە قاتەرلى ىسىگىنىڭ ءتورت مىڭعا جۋىق جاعدايى انىقتالادى، ونىڭ ەكى مىڭعا جۋىعى ولىممەن اياقتالادى. دارىگەرلەر مۇنداي ستاتيستيكانى اۋرۋدىڭ كەش انىقتالۋىمەن بايلانىستىرادى. سوندىقتان ەرتە دياگنوستيكاعا ەرەكشە كوڭىل بولىنەدى، ال تومەن دوزالى كومپيۋتەرلىك توموگرافيا قازاقستاندا العاش رەت ەنگىزىلگەن نەگىزگى ادىستەردىڭ ءبىرى بولىپ تابىلادى.
«كومپيۋتەرلىك توموگرافيا كەۋدە قۋىسىنىڭ ءاربىر ميلليمەترىن قابات-قابات كەسكىندەيدى. ميلليمەترلىك قيىندىلار 2-3 ميلليمەترلىك وكپە تۇيىندەرىن جىبەرىپ الماۋعا مۇمكىندىك بەرەدى. بۇل وتە ەرتە انىقتاۋ، وكپە قاتەرلى ىسىگىنەن بولاتىن ءولىمدى ازايتۋعا جەتكىزەدى»، — دەپ تۇسىندىرەدى قازعزيوير راديولوگيا جانە يادرولىق مەديسينا ءبولىمىنىڭ مەڭگەرۋشىسى جاندوس امانقۇلوۆ.
مامانداردىڭ ايتۋىنشا، جاڭا ادىستەگى ساۋلەلىك جۇكتەمە كادىمگى كومپيۋتەرلىك توموگرافيا مەن فليۋوروگرافياعا قاراعاندا ايتارلىقتاي تومەن. پروسەدۋرا بىرنەشە سەكۋند قانا الادى جانە ارنايى دايىندىقتى قاجەت ەتپەيدى: اش بولۋدىڭ، اناليز تاپسىرۋدىڭ نەمەسە ادەتتەگى دارىلەردى قابىلداۋدى توقتاتۋدىڭ قاجەتى جوق.
«تومەن دوزالى كومپيۋتەرلىك توموگرافيا ارقىلى جوعارى ءقاۋىپ توبىنداعى پاسيەنتتەرگە سكرينينگ جۇرگىزۋدى جوسپارلاپ وتىرمىز. بۇل — 50 جاستان اسقاندار، تەمەكى شەگەتىندەر، جاقىندا تەمەكىنى تاستاعان نەمەسە ۇزاق ۋاقىت شەككەندەر، سونداي-اق زياندى جاعدايدا جۇمىس ىستەيتىندەر، شاڭمەن، حيميكاتتارمەن جانە كانسەروگەندى زاتتارمەن بايلانىستا بولاتىندار»، — دەپ اتاپ ءوتتى ونكولوگ دارىگەر باۋىرجان يمانبەكوۆ.
قازاقستاندىقتار 15 تامىزعا دەيىن تومەن دوزالى كومپيۋتەرلىك توموگرافيادان تەگىن وتە الادى. بارلىعى 1600-دەن استام ادامدى تەكسەرۋ جوسپارلانۋدا. وكپەنى تەكسەرۋگە جازىلۋ مەكەنجايلارى مەن تەلەفوندارىن قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ سايتىنان بىلۋگە بولادى. ەسكە سالايىق، قازاقستاندا تۇراقتى نەگىزدە ءۇش ءتۇرلى ونكولوگيالىق سكرينينگ تەگىن جۇرگىزىلەدى — ءسۇت بەزى قاتەرلى ىسىگى، جاتىر موينى قاتەرلى ىسىگى جانە كولورەكتالدى قاتەرلى ىسىك. ءبىرىنشى جارتىجىلدىقتا ەكى ميلليوننان استام ادام تەكسەرۋدەن ءوتتى.