قازاقستاندا وكپە قاتەرلى ىسىگى تۋرالى حاباردارلىق اپتالىعى باستالادى. وسى اياسىندا تاۋەكەل توبىنداعى ازاماتتار اۋرۋدى ەرتە انىقتاۋ ءۇشىن تومەن دوزالى كومپيۋتەرلىك توموگرافيادان تەگىن وتە الادى، دەپ حابارلايدى infohub.kz سايتى.
قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ ماماندارىنىڭ ايتۋىنشا، اكسيا 10-15 تامىز ارالىعىندا ءوتىپ، ەلدەگى بارلىق ونكولوگيالىق ورتالىقتاردا ءبىرىڭعاي قابىلداۋ كۇنىمەن اياقتالادى. وسى كەزەڭدە 50 جاستان اسقان قازاقستاندىقتار، تەمەكى شەگۋ ءوتىلى ۇزاق ازاماتتار، بۇرىنعى تەمەكى شەگۋشىلەر، سونداي-اق زياندى ءوندىرىس قىزمەتكەرلەرى تەگىن تەكسەرىستەن وتە الادى.
ونكولوگتار وكپە قاتەرلى ىسىگى ۇزاق ۋاقىت سيمپتومسىز وتەتىنىن، سوندىقتان جىل سايىن شامامەن 2 مىڭ قازاقستاندىق تىم كەش قويىلعان دياگنوزدان قايتىس بولاتىنىن اتاپ وتەدى. ال ەلدە جىل سايىن «وكپە قاتەرلى ىسىگى» دياگنوزىن 4 مىڭعا دەيىن ازامات ەستيدى.
بۇعان دەيىن الماتىدا 2026 جىلدىڭ العاشقى التى ايىنداعى پروفيلاكتيكالىق تەكسەرۋ قورىتىندىسى شىعارىلعانى حابارلانعان بولاتىن: قالا تۇرعىندارىنان 250-دەن استام قاتەرلى ىسىك جاعدايى انىقتالدى. سونىمەن قاتار، تەرى، سۇيەك جانە جۇمساق تىندەر ساركوماسىن ەرتە انىقتاۋعا ارنالعان اشىق ەسىك كۇنىندە سەگىز پاسيەنتتەن قاتەرلى ىسىككە كۇدىكتى ىسىكتەر، ال 28 ادامنان ىسىك الدى جاعدايلار تابىلدى.
سونداي-اق، الماتىدا 250 توسەككە ارنالعان زاماناۋي ونكوورتالىق پايدا بولاتىنى بەلگىلى بولدى. جوبا مەملەكەتتىك ساراپتامادان وتكەن. مەديسينالىق مەكەمە روبوتوتەحنيكاسى بار وپەراسيالىق بلوكپەن، مولەكۋلالىق-گەنەتيكالىق زەرتحانامەن جانە دارى-دارمەك دايىنداۋدىڭ اۆتوماتتاندىرىلعان جۇيەسىمەن جابدىقتالادى، بۇل قاتەرلى ىسىكتى ەرتە كەزەڭدە انىقتاۋعا جانە جوعارى تەحنولوگيالىق كومەك كورسەتۋگە مۇمكىندىك بەرەدى.