حالىقارالىق عالىمدار توبى وكسيتوسيننىڭ كۇدىكتەنۋگە بەيىم ەر ادامداردا سەنىم دەڭگەيىن ارتتىرا الاتىنىن انىقتادى. 359 ەرىكتى قاتىسقان ەكسپەريمەنت بارىسىندا گورموننىڭ ەنگىزىلۋى بەيتانىس ادامدارعا اقشا سەنىپ تاپسىرۋعا دايىندىقتى 15%-عا ارتتىرعانىن infohub.kz سايتى حابارلايدى.
سيۋريح ۋنيۆەرسيتەتىنىڭ زەرتتەۋشىلەرى ەرنست فەردىڭ جەتەكشىلىگىمەن گەرمانيا مەن بەلگياداعى ارىپتەستەرىمەن بىرلەسىپ، وكسيتوسيننىڭ الەۋمەتتىك مىنەز-ق ۇلىققا اسەرىن كەڭ اۋقىمدى زەرتتەۋ ناتيجەلەرىن ۇسىندى. ەكسپەريمەنتكە باستاپقىدا اينالاسىنداعىلارعا دەگەن سەنىم دەڭگەيى تومەن دەپ تانىلعان 359 ەر ادام قاتىستى.
قاتىسۋشىلار وكسيتوسين نەمەسە پلاسەبو الدى، سودان كەيىن بەيتانىس ادامعا اقشا سەنىپ تاپسىرۋ قاجەت بولاتىن ءانونيمدى قارجىلىق ويىن وينادى. سەنىمگە بەيىمدىلىگى تومەن، ءبىراق گورموندىق پرەپارات قابىلداعان ەر ادامدار باقىلاۋ توبىنداعى قاتىسۋشىلارعا قاراعاندا سەرىكتەستەرىنە ورتا ەسەپپەن 15%-عا كوپ قاراجات اۋدارعان. الدىڭعى تەستتەردى ەسكەرە وتىرىپ جاسالعان تالداۋ كورسەتكىشتىڭ 17%-عا دەيىن وسكەنىن كورسەتتى.
جۇمىس اۆتورلارى وكسيتوسيننىڭ تاڭدامالى اسەر ەتەتىنىن جانە بارلىق ادامداردى بىردەي سەنگىش ەتە بەرمەيتىنىن اتاپ وتەدى. ماماندار بۇل پروسەستىڭ ناقتى بيولوگيالىق مەحانيزمدەرىن انىقتاۋ جانە ايەلدەردە دە وسىنداي اسەر بايقالاتىنىن تەكسەرۋ ءۇشىن زەرتتەۋلەردى جالعاستىرۋدى جوسپارلاپ وتىر.