Associated Press حابارلاۋىنشا، ومان جاعالاۋىندا تۇرعان سانكسيالانعان تانكەردەن مۇناي اعىپ، تەڭىز قورىعىنىڭ ماڭىنا تارالۋدا. جۇما كۇنى تۇسىرىلگەن سوڭعى سۋرەتتەردە شامامەن 20 شارشى شاقىرىمدى الىپ جاتقان مۇناي داعى جانە دحوفار پروۆينسياسىنداعى حاللانيات ارالدارىنىڭ قۇرامىنا كىرەتىن قيبليا ارالىنىڭ جاعالاۋىنداعى قارا داقتار كورىنەدى.
گوللانديالىق PAX بەيبىتشىلىك ۇيىمىنىڭ ەكولوگ-ساراپشىسى ۆيم زۆەينەنبۋرگتىڭ ايتۋىنشا، مۇناي تانكەردەن بىرتىندەپ اعىپ، جاعالاۋعا جەتىپ، ارالدىڭ اينالاسىنا جۇقا قابات بولىپ تارالعان. ول سوڭعى كۇندەرى داقتىڭ كولەمى ۇلعايىپ، اعىس كۇشەيگەنىن اتاپ ءوتتى. ونىڭ پىكىرىنشە، باستى ءقاۋىپ — كەمەنىڭ بولشەكتەنۋى، ويتكەنى مامىردان قىركۇيەككە دەيىن سوزىلاتىن جەلدى مۋسسون ماۋسىمى كورپۋستى زاقىمداۋى مۇمكىن.
زۆەينەنبۋرگتىڭ بولجامىنشا، تانكەردە 800 مىڭنان استام باررەل شيكى مۇناي بار. 28 شىلدەدەگى سۋرەتتەردە مۇناي نەگىزىنەن كەمەنىڭ سولتۇستىك-باتىسىنداعى شىعاناقتا جينالعانى، داق جاعالاۋدى جاۋىپ تۇرعانى كورىنگەن.
ۇزىندىعى 274 مەترلىك Suezmax كلاسىنداعى، كامەرۋن تۋى استىندا جۇزەتىن Caroline Bezengi تانكەرى رەسەيدەن شىققان مۇنايدى تاسىمالداعانى جانە ۋكراينانى تۇراقسىزداندىرۋعا باعىتتالعان ارەكەتتەرگە قاتىسقانى ءۇشىن ۇلىبريتانيا تاراپىنان سانكسيالانعان. ول سونداي-اق ەو، كانادا جانە شۆەيساريا سانكسيالارىنا ىلىككەن. كەمە ماۋسىم ايىنان بەرى دحوفار جاعالاۋىندا تۇرىپ قالعان، ەكيپاج سول كەزدە بورتىندا جارىلىس بولعانىن حابارلاعان، دەپ جازادى تەڭىز باسىلىمدارى. AP بۇل اقپاراتتى ءوز بەتىنشە راستاي المادى.
گەودەزيالىق دەرەكتەر كومپانياسى SynMax Maritime مامىر ايىندا تانكەردىڭ رەسەيدەگى نوۆوروسسيسك پورتىندا تۇرعانىن كورسەتەتىن سۋرەتتەر العانىن مالىمدەدى.
Greenpeace گەرمانياسىنىڭ وكىلى نينا نوەلدىڭ ايتۋىنشا، بۇل جاعداي — رەسەيدىڭ كولەڭكەلى فلوتىنىڭ قورشاعان ورتاعا توندىرەتىن ءقاۋپىنىڭ تاعى ءبىر الاڭداتارلىق مىسالى. 24 شىلدەدەگى جاعداي بويىنشا، مۇناي اعىسىنىڭ سالدارى ايقىن بايقالىپ، جاعالاۋلار مەن سەزىمتال تەڭىز ەكوجۇيەلەرى لاستانعان. «مۇناي اعىسى جالعاسىپ جاتقاندىقتان جانە تانكەر قيىن جەردە تۇرىپ قالعاندىقتان، ايماقتىڭ جاعالاۋلارى مەن تەڭىز ەكوجۇيەلەرىنە ودان دا اۋىر زارداپ اكەلەتىن الدەقايدا ۇلكەن مۇناي اپاتىنىڭ ءقاۋپى بار»، — دەدى نوەل.
بۇل ايماق — سيرەك كەزدەسەتىن سۇتقورەكتىلەر مەن قۇستاردىڭ، سونىڭ ىشىندە جويىلىپ بارا جاتقان بۇرىلعىلاردىڭ مەكەنى بولىپ تابىلاتىن اراب تەڭىزى قورىعىنىڭ بولىگى. ومان كولىك، كوممۋنيكاسيا جانە اقپاراتتىق تەحنولوگيالار مينيسترلىگى كەمە يەلەرىنە ونى جانە جۇگىن 23 شىلدەگە دەيىن الىپ كەتۋدى بۇيىرعان. يەلەرىنىڭ جاۋاپ بەرگەن-بەرمەگەنى بەلگىسىز.