رەسەيدىڭ ومبى قالاسىنداعى قۇرىلىس الاڭىندا بولعان ءورت سالدارىنان ەكى ەر ادام قازا تاپتى، ولاردىڭ ءبىرى قازاقستان ازاماتى ەدى. 24 جاستاعى ماكسيم باگينسكي دەنەسىنىڭ شامامەن 70 پايىزىن كۇيىك العان بولاتىن، ول 18 تامىزدا اۋرۋحانادا قايتىس بولدى، دەپ حابارلايدى infohub.kz.
تاسس مالىمەتىنشە، قايتىس بولعان ازامات نىساننىڭ مەردىگەرى بولعان «گلوبال ينجينيرينگ» كومپانياسىندا جۇمىس ىستەگەن. رەسەيدىڭ تەرگەۋ كوميتەتى جاس جىگىتتىڭ وسى ۇيىمنىڭ قىزمەتكەرى بولعانىن راستادى.
قازاقستان رەسپۋبليكاسى سىرتقى ىستەر مينيسترلىگى وتانداسىمىزدىڭ قازاسىن راستادى. ۆەدومستۆونىڭ رەسمي مالىمدەمەسىندە: «قازاقستان رەسپۋبليكاسى سىرتقى ىستەر مينيسترلىگى 2026 جىلعى 18 تامىزدا ومبى قالاسىندا بولعان ءورت سالدارىنان قازا تاپقان قازاقستان رەسپۋبليكاسى ازاماتىنىڭ تۋعان-تۋىستارى مەن جاقىندارىنا شىن جۇرەكتەن كوڭىل ايتادى»، — دەلىنگەن.
قازاقستاننىڭ ومبىداعى باس كونسۋلدىعى قايتىس بولعان ازاماتتىڭ وتباسىنا قاجەتتى قۇجاتتاردى راسىمدەۋگە كومەك كورسەتىپ، رەسەيدىڭ قۇزىرلى ورگاندارىمەن بايلانىستا. ءسىم تۋىستارىمەن بايلانىستا ەكەنىن دە اتاپ ءوتتى.
وقيعاعا بايلانىستى رەسەيدە ەڭبەكتى قورعاۋ تالاپتارىن بۇزۋ بابى بويىنشا قىلمىستىق ءىس قوزعالدى. تەرگەۋ ءورتتىڭ سەبەپتەرىن جانە قۇرىلىس الاڭىنداعى جۇمىسشىلاردىڭ قاۋىپسىزدىگىنە جاۋاپتى ادامداردى انىقتاپ جاتىر.
رەسەي ارنايى قىزمەتتەرىنىڭ دەرەگىنشە، بارلىعى 11 ادام زارداپ شەكتى. ەڭ اۋىر كۇيىك العان ەكى ناۋقاس بۇعان دەيىن نيجني نوۆگورودقا جەتكىزىلگەن.