چەحيالىق Omnipol Defence a.s. كومپانياسى اقتوبە وبلىسىنا L-410 ۇشاقتارىن جەتكىزۋ مۇمكىندىگىن قاراستىرىپ جاتىر. وبلىس اكىمى اسحات شاحاروۆتىڭ ايتۋىنشا، جوبانى قارجىلاندىرۋ ماسەلەلەرى ونەركاسىپتى دامىتۋ قورىمەن بىرلەسىپ پىسىقتالۋدا، دەپ حابارلايدى infohub.kz سايتى.
اكىم ۇشاقتاردى جەتكىزۋ ماسەلەسىن Omnipol Defence a.s. ديرەكتورلار كەڭەسىنىڭ ءتوراعاسى ارتەم موۆسەسيانمەن كەزدەسۋدە تالقىلادى.
ونىڭ ايتۋىنشا، ۇشاقتاردى جەتكىزۋدىڭ وبلىس ءۇشىن ماڭىزى زور، ويتكەنى مۇندا شاعىن اۆياسيانى بەلسەندى دامىتۋ جوسپارلانىپ وتىر. سونىمەن قاتار وبلىس الدىندا ماماندار دايارلاۋ جانە وڭىرلىك اۋە قاتىناسىن جولعا قويۋ ءۇشىن قاجەتتى ينفراقۇرىلىم قۇرۋ مىندەتى تۇر.
بۇدان بولەك، شاحاروۆ شالقاردا اۋەجاي سالۋعا جاريالانعان كونكۋرس تۋرالى ايتىپ بەردى.
ءوز كەزەگىندە Omnipol وكىلدەرى ۇشاقتاردى پايدالانۋعا قاجەتتى جەرۇستى جابدىقتارىن دايىنداۋعا قاتىسۋعا كەلىستى.
ارتەم موۆسەسيان حولدينگ قۇرامىندا شاعىن جانە ورتا اۋەجايلاردىڭ ينفراقۇرىلىمىنا ماماندانعان Omnipol Airports دەگەن جەكە باعىت جۇمىس ىستەيتىنىن اتاپ ءوتتى. كومپانيا جارىق سيگنالدىق جابدىق، اۋە قوزعالىسىن باسقارۋ جانە ناۆيگاسيا جۇيەلەرى بويىنشا شەشىمدەر ۇسىنۋعا دايىن.
ايتا كەتەيىك، L-410 ۇشاقتارى قازاقستاندا الدەقاشان پايدالانىلىپ كەلەدى. تالعات بەگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتى 2023 جىلدان بەرى اقتوبەدە ەكى L 410 UVP-E20 ۇشاعىن ورنالاستىرىپ وتىر. تاعى ءتورت L 410 NG ۇشاعى قازاقستان رەسپۋبليكاسى توتەنشە جاعدايلار مينيسترلىگىنىڭ «قازاۆياسپاس» اق پايدالانۋىندا.
L-410 — 19 جولاۋشىعا دەيىن سىيدىراتىن، شاعىن جانە ورتا قاشىقتىققا تاسىمالداۋعا ارنالعان ءتۋربوۆينتتى ۇشاق. بۇل تيپتەگى ۇشاقتار ۇشۋ-قونۋ جولاعى سالىستىرمالى تۇردە قىسقا اۋەايلاقتاردا دا پايدالانىلا الادى، بۇل جەرگىلىكتى اۋەجايلار جەلىسىن دامىتۋ ءۇشىن ماڭىزدى.
بۇعان دەيىن «كۋرسيۆ» جازعانداي، Air Astana باس اتقارۋشى ديرەكتورى (سەو) يبراحيم جانلىەل قازاقستاننان نيۋ-يورك پەن توكيوعا تىكەلەي رەيستەردى ورىنداۋعا ارنالعان العاشقى Boeing 787 Dreamliner ۇشاقتارى رەسپۋبليكاعا وسى جىلدىڭ جەلتوقسانىندا كەلەتىنىن مالىمدەگەن ەدى.