وڭتۇستىك كورەيا پرەزيدەنتى لي چجە مەن قازاقستان پرەزيدەنتى قاسىم-جومارت توقاەۆقا جانە ۇلتتىق قاۋىپسىزدىك كوميتەتىنە قىلمىسكەرلەردى ۇستاۋعا كومەكتەسكەنى ءۇشىن العىس ءبىلدىردى، دەپ حابارلايدى infohub.kz.
لي چجە مەن ءوزىنىڭ X الەۋمەتتىك جەلىسىندەگى پاراقشاسىندا قازاق تىلىندە جازبا جاريالاپ، كامبودجا مەن ۆەتنام ارقىلى قازاقستانعا زاڭسىز كىرگەن جانە ءوز ەلىنىڭ ازاماتتارىنا قارسى تەلەفون الاياقتىقپەن اينالىسقان كورەيا رەسپۋبليكاسىنىڭ ۇيىمداسقان قىلمىستىق توبىنىڭ مۇشەلەرى ۇستالعاننان كەيىن ەكى اپتا ىشىندە ەلگە قايتارىلىپ، ءقازىر تەرگەۋ امالدارى ءجۇرىپ جاتقانىن اتاپ ءوتتى.
«ۇستاۋدان دەپورتاسياعا دەيىنگى جۇمىستىڭ جەدەل ورىندالۋى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ پەن قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ بەلسەندى قولداۋى مەن ىنتىماقتاستىعىنىڭ ارقاسىندا مۇمكىن بولدى»، — دەپ جازدى لي چجە مەن.
ول سونداي-اق قازاقستاندىق كوشباسشىمەن جاقىن ارادا جەكە كەزدەسۋگە ءۇمىت ءبىلدىردى. «ءبىز قاسىم-جومارت توقايەۆ مىرزاعا جانە ءتيىستى تاراپتارعا شىن جۇرەكتەن العىسىمىزدى بىلدىرەمىز. كەلەسى ايدا وتەتىن كورەيا رەسپۋبليكاسى — ورتالىق ازيا سامميتىندە جەكە كەزدەسىپ، العىسىمىزدى بىلدىرۋگە مۇمكىندىك بولادى دەپ ۇمىتتەنەمىز. كورەيا رەسپۋبليكاسى ازاماتتارىنىڭ قاۋىپسىزدىگى مەن بەيبىت ومىرىنە ءقاۋىپ توندىرەتىن قىلمىستارعا ەشقانداي جاعدايدا جول بەرىلمەيدى. ولار قايدا جاسىرىنسا دا، ءبىز ولاردى سوڭىنا دەيىن تاۋىپ، جاۋاپقا تارتامىز»، — دەپ اتاپ ءوتتى وڭتۇستىك كورەيا پرەزيدەنتى.
ەسكە سالايىق، 30 شىلدەدە ق ر ۇلتتىق قاۋىپسىزدىك كوميتەتى وڭتۇستىك كورەيانىڭ 14 ازاماتىنىڭ ۇستالعانىن حابارلاعان بولاتىن. ولاردىڭ وتانىندا ولاردى ۇيىمداسقان قىلمىستىق توپ قۇرامىندا الاياقتىق جاسادى دەپ كۇدىكتەيدى.