وڭتۇستىك كورەيا سوڭعى جىلدارداعى ەڭ اۋقىمدى تەحنولوگيالىق باعدارلامالاردىڭ ءبىرىن ۇسىندى. ەل 2030 جىلعا قاراي ايعا قونۋدى، ءوزىنىڭ كۆانتتىق كومپيۋتەرىن جاساۋدى جانە جاقىندا عانا عىلىمي فانتاستيكا بولىپ كورىنگەن تەحنولوگيالاردى نارىققا شىعارۋدى كوزدەپ وتىر، دەپ حابارلايدى infohub.kz سايتى.
جاڭا مەملەكەتتىك باستاما Seven Major SEED دەپ اتالادى جانە دامۋدىڭ جەتى نەگىزگى باعىتىن قامتيدى. بيلىك ءدال وسىلار جاساندى ينتەللەكت پەن جارتىلاي وتكىزگىشتەردەن كەيىنگى ەل ەكونوميكاسىنىڭ نەگىزىنە اينالادى دەپ ەسەپتەيدى.
ەڭ اۋقىمدى ماقساتتاردىڭ ءبىرى — 2030 جىلى ايعا قونۋ. ودان ەكى جىل وتكەن سوڭ وڭتۇستىك كورەيا ەكىنشى اي ميسسياسىن جىبەرۋدى جوسپارلاپ وتىر، ال 2035 جىلعا قاراي تومەن جەر وربيتاسىندا ءوزىنىڭ سپۋتنيكتىك بايلانىس جەلىسىن قۇرۋدى كوزدەيدى.
ەسەپتەۋ تەحنولوگيالارىنا قاتىستى دا جوسپارلار ودان كەم ەمەس. 2029 جىلعا قاراي ەل ءوزىنىڭ 100-كۋبيتتىك كۆانتتىق كومپيۋتەرىن (قازىرگى دك شەشە المايتىن ەسەپتەردى شىعارا الاتىن بولاشاق كومپيۋتەرى) جاساۋدى، ال 2035 جىلعا قاراي كۆانتتىق چيپتەر ءوندىرىسى بويىنشا الەمدىك كوشباسشىلاردىڭ بىرىنە اينالۋدى جوسپارلاپ وتىر.
ەنەرگەتيكاعا دا ۇلكەن كوڭىل بولىنەدى. وڭتۇستىك كورەيا 2035 جىلعا قاراي ءوزىنىڭ شاعىن ءمودۋلدى يادرولىق رەاكتورلارىن كوممەرسيالاندىرۋدى، تەرمويادرولىق ەنەرگەتيكانى، جاڭا كۇن پانەلدەرىن، تەڭىز جەل ەلەكتر ستانسيالارىن جانە سۋتەگى ءوندىرۋ تەحنولوگيالارىن دامىتۋدى جوسپارلاپ وتىر.
باعدارلاماعا بيوتەحنولوگيالار دا ەندى. ماقساتتار قاتارىندا جاساندى ينتەللەكت پەن بيومەديسينانى بىرىكتىرەتىن ينفراقۇرىلىم قۇرۋ، جي كومەگىمەن دارى-دارمەك ازىرلەۋ، اۆتوماتتاندىرىلعان زەرتحانالار، گەندىك تەراپيانىڭ جاڭا ادىستەرى جانە 2035 جىلعا قاراي «مي — كومپيۋتەر» ينتەرفەيستەرىن كوممەرسيالاندىرۋ بار.
وڭتۇستىك كورەيا پرەزيدەنتى لي چجە ءمون ەل كەلەسى تەحنولوگيالىق سەرپىلىستەرگە الدىن الا دايىندالۋى كەرەك، ولاردىڭ جاپپاي قولدانىسقا ەنۋىن كۇتىپ وتىرماۋى قاجەت دەپ مالىمدەدى.
«وسى جەتى جوبا جاڭا بۋىننىڭ ءوسۋ قوزعالتقىشى جانە ەلدىڭ نەگىزگى ستراتەگيالىق اكتيۆتەرىنە اينالادى»، — دەپ اتاپ ءوتتى ول.
ۇكىمەتتىڭ ايتۋىنشا، جاڭا باعىتتار وڭتۇستىك كورەياعا حالىقتىڭ قارتايۋى جانە جوعارى تەحنولوگيالار سالاسىنداعى كوشباسشىلىق ءۇشىن كۇشەيىپ كەلە جاتقان الەمدىك باسەكە جاعدايىندا باسەكەگە قابىلەتتىلىگىن ساقتاۋعا كومەكتەسۋى ءتيىس.