وڭتۇستىك كورەيا سوتى ويىن يندۋسترياسىنىڭ ماگناتى كۆون حوك ءبيندى بۇرىنعى ايەلىنە 2،55 تريلليون ۆون (1،87 ملرد دوللار) كولەمىندەگى اكتيۆتەردى تولەۋگە مىندەتتەدى. بۇل ەل تاريحىنداعى ەڭ ءىرى اجىراسۋ تولەمى بولىپ وتىر. بۇل تۋرالى infohub.kz سايتى حابارلايدى.
كۆون حوك بين — وڭتۇستىك كورەيانىڭ ءۇشىنشى ءىرى بەينەويىن كومپانياسى Smilegateء-تىڭ نەگىزىن قالاۋشى. Bloomberg دەرەكتەرى بويىنشا، ونىڭ تازا بايلىعى 3 ملرد دوللاردى قۇرايدى. سوت شەشىمىنە دەيىن كومپانيا تولىعىمەن وعان تيەسىلى ەدى. الايدا سوت ونىڭ 35% ۇلەسىن، ياعني شامامەن 2،5 تريلليون ۆونعا باعالاناتىن اكسيالاردى بۇرىنعى ايەلى لي حۆا دجينگە بەرۋدى ۇيعاردى. سونىمەن قاتار، ول وعان قوسىمشا 65 ملرد ۆون قولما-قول اقشا تولەۋى ءتيىس.
بۇل تولەم الدىڭعى رەكوردتان ەكى ەسەدەن استام جوعارى. بۇعان دەيىن تەحنولوگيالىق الپاۋىت SK Group ءتوراعاسى چحۆە تە ۆون بۇرىنعى ايەلىنە 944 ملرد ۆون تولەۋگە مىندەتتەلگەن ەدى.
كۆونمەن اجىراسۋ تۋرالى ارىز بەرگەن لي حۆا دجين Smilegateء-تىڭ 50% ۇلەسىن تالاپ ەتكەن. ونىڭ ادۆوكاتتارى كومپانيا قۇرىلعان كەزدە ونىڭ قارجىلاندىرۋعا كومەكتەسكەنىن العا تارتتى. بۇل تۋرالى Bloomberg حابارلايدى. كۆون مەن لي 2001 جىلى ۇيلەنگەن، ال كۆون Smilegateء-تى ءبىر جىلدان كەيىن قۇرعان. كومپانيانىڭ ەڭ تانىمال ويىندارى — ءبىرىنشى ادام كوزقاراسىنداعى شۋتەر CrossFire جانە رولدىك ويىن Lost Ark.
لي حۆا دجين ءوزىنىڭ 20 جىلدان استام ۋاقىتىن بالالاردى تاربيەلەۋگە جانە ءۇي شارۋاسىنا ارناعانىن ايتقان. ال كۆون بولسا، لي كومپانياعا ينۆەستيسيا سالماعانىن جانە وندا جۇمىس ىستەمەگەنىن العا تارتقان. وسى جىلدىڭ باسىندا Smilegate كومپانيانىڭ بارلىق باستاپقى كاپيتالى كۆوننان كەلگەنىن مالىمدەگەن بولاتىن.
Smilegate وكىلى «ءىرى اكسيونەردىڭ جەكە ىستەرىنە تۇسىنىكتەمە بەرۋدەن باس تارتتى». The Chosun Daily گازەتىنە سىلتەمە جاساعان مالىمدەمەدە ولار: «ءبىز ادەتتەگىدەي ءوز مىندەتتەرىمىزدى ادال اتقارا بەرەمىز»، — دەگەن.
ەكى تاراپ تا سوت شەشىمىنە شاعىمدانا الادى. وسى جىلدىڭ شىلدە ايىندا SK Group ءتوراعاسى چحۆە تە ۆون بۇرىنعى ايەلىنە 944 ملرد ۆون تولەۋگە مىندەتتەلگەن ەدى. بۇل بۇگىنگى شەشىمگە دەيىن كورەيا تاريحىنداعى ەڭ ءىرى اجىراسۋ تولەمى بولاتىن. الايدا كەيىن جوعارعى سوت جۇبايلار اكتيۆتەرىنىڭ قۇنىن اسىرا باعالاعان ەسەپتەۋ قاتەلىگىن اتاپ، بۇل شەشىمدى جويدى. ءىس قايتا قاراۋعا جىبەرىلدى.