دۇيسەنبىدە وڭتۇستىك كورەيانىڭ وڭتۇستىگىندە نوسەرلى جاڭبىر سالدارىنان ءبىر ادام قازا تاۋىپ، ءتورت ادام جاراقات الدى. ىشكى ىستەر جانە قاۋىپسىزدىك مينيسترلىگىنىڭ مالىمەتىنشە، كەجە قالاسىنداعى تۇرعىن ءۇي كەشەنىنە كوشكىن ءجۇرىپ، ءبىر ادام قازا تاپقان. تاعى ەكى ادام كەجەدە، ەكەۋى كورشى قالالاردا جاراقات العان.
مينيسترلىك حابارلاماسىندا سەنبىدەن بەرى وڭتۇستىك كورەيانىڭ وڭتۇستىگىندە جاۋعان نوسەرلى جاڭبىر شامامەن 390 ادامدى ءقاۋىپسىز جەرگە ەۆاكۋاسيالاۋعا ماجبۇرلەپ، شامامەن 3580 ۇيدە ەلەكتر جارىعىنىڭ وشىرگەنى ايتىلعان. فيليپپيندە مۋسسوندىق جاڭبىردىڭ سالدارىنان ەرتەڭگى ۋاقىتتا مانيلانىڭ تىعىز قونىستانعان ايماعىندا جانە ونداعان شالعاي پروۆينسيالاردا ءىرى كوشەلەر سۋ استىندا قالىپ، كولىك قوزعالىسى قيىندادى. بۇعان بايلانىستى ۇكىمەت تۇسكى ۋاقىتتان باستاپ مەملەكەتتىك قىزمەتتى توقتاتىپ، بارلىق دەڭگەيدەگى وقۋ ورىندارىندا ساباقتاردى توقتاتتى. مەكتەپتەر ونلاين وقىتۋعا كوشۋگە شاقىرىلدى.
ازاماتتىق قورعانىس باسقارماسىنىڭ مالىمەتىنشە، شامامەن ءۇش اپتا بويى ۇزىلىسپەن جاۋعان مۋسسوندىق جاڭبىر مەن ەكى اپتا بۇرىن لۋسون ارالىنىڭ سولتۇستىك ايماعىن سوققان داۋىل سالدارىنان كەمىندە 23 ادام قازا تاپتى، نەگىزىنەن كوشكىن مەن تاسقىننان. سونداي-اق 5 ميلليون ادام زارداپ شەكتى، ونىڭ ىشىندە دۇيسەنبىدە بىرنەشە سولتۇستىك پروۆينسيالارداعى ۇكىمەتتىك اپاتتىق باسپانالاردا قالعان 25 مىڭعا جۋىق ادام بار.
قازا تاپقانداردىڭ اراسىندا تاۋلى كۋرورتتىق باگيو قالاسىندا 9 تامىزداعى كوشكىننەن ۇيلەرى قيراعان 10 ادام، ونىڭ ىشىندە بالالار دا بار. تاعى ءۇش ادام تۇندە ۇيىقتاپ جاتقاندا تاۋ بەتكەيىنەن قۇلاعان لاي، تاس جانە قوقىس استىنان قۇتقارۋشىلار تاراپىنان تىرىدەي قازىلىپ الىندى، دەپ حابارلادى شەنەۋنىكتەر.