وڭتۇستىك كورەيانىڭ پحەنتحەك قالاسىنىڭ پوليسياسى شەتەلدىكتەر قاتىسقان جاپپاي توبەلەستى تەرگەپ جاتىر. قازاقستان مەن قىرعىزستان ازاماتتارى اراسىنداعى قاقتىعىس بولدى دەگەن نۇسقا تەكسەرىلۋدە، دەپ حابارلايدى infohub.kz سايتى.
وقيعا 3 قازان كۇنى كەشكە پحەنتحەك پورتىنىڭ ماڭىندا بولعان. وقيعا ورنىنىڭ جانىندا بالاباقشا مەن باستاۋىش مەكتەپ ورنالاسقان. تەرگەۋ دەرەكتەرى بويىنشا، توبەلەسكە شامامەن 15 ادام قاتىسقان.
پوليسيا 20 جاس شاماسىنداعى ەكى ەر ادامدى ۇستادى — رەسەي ازاماتى مەن قىرعىزستان ازاماتى. ەكەۋى دە جاراقات الىپ، سونىڭ ىشىندە سىنىقپەن اۋرۋحاناعا جات قىزىلدى. ۇستالعاندار شابۋىلعا قاتىسقانىن جوققا شىعارىپ، كوشەدە كەلە جاتىپ وزدەرى دە ۇرىپ-سوعۋدىڭ قۇربانى بولعانىن ايتادى.
توبەلەسكە قاتىسقان دەگەن قالعان ادامدار قاشىپ كەتكەن. ولاردىڭ جەكە باسى مەن ازاماتتىعى ازىرگە انىقتالماعان. پوليسيا قازاقستاندىقتاردىڭ قاتىسۋى تۋرالى نۇسقانى تەكسەرۋدە، الايدا قازىرگە دەيىن راستالعان دەرەك جوق.
وقيعا ورنىنان اعاش تاقتايلار مەن بەيسبول بيتاسى تابىلدى. تەمىر شەگەلەرى بار قارۋ قولدانىلدى دەگەن قاۋەسەت راستالمادى.
قۇقىق قورعاۋ ورگاندارى بەينەباقىلاۋ كامەرالارىنىڭ جازبالارىن جانە قاقتىعىسقا قاتىسۋشىلار كەتۋى مۇمكىن كولىكتەردىڭ نومىرلەرىن زەرتتەپ جاتىر. تەرگەۋشىلەر ولاردىڭ الدىن الا كەزدەسۋگە كەلىسكەنىن جانە كولىكتى كىم بەرگەنىن دە تەكسەرۋدە.
«قوعامداعى الاڭداۋشىلىقتىڭ الدىن الۋ ءۇشىن قىلمىسكەرلەردى ۇستاعانعا دەيىن قىلمىستىڭ الدىن الۋ شارالارىن جۇرگىزۋگە بارلىق قولدا بار قىزمەتكەرلەردى جۇمىلدىرامىز»، — دەدى پوليسيا وكىلى.
ەگەر شابۋىلعا قاتىسۋى دالەلدەنسە، كىنالىلەرگە بەس جىلعا دەيىن باس بوستاندىعىنان ايىرۋ نەمەسە 10 ملن ۆونعا دەيىن (شامامەن 3،39 ملن تەڭگە) ايىپپۇل سالىنۋى مۇمكىن. مۇنداي جاعدايدا دەنە جاراقاتى كەلتىرىلسە، جازا ءبىر جىلدان ون جىلعا دەيىن باس بوستاندىعىنان ايىرۋ بولۋى مۇمكىن.
قىلمىستىق جازادان بولەك، شەتەلدىكتەرگە وڭتۇستىك كورەيادان دەپورتاسيالاۋ ءقاۋپى ءتونۋى مۇمكىن. بۇل ماسەلەنى كوشى-قون ورگاندارى ءىستىڭ ءمان-جايى مەن بولۋ مارتەبەسىن ەسكەرە وتىرىپ قاراستىرۋدا. ۇستالعانداردى شىعارۋ تۋرالى شەشىم ازىرگە حابارلانعان جوق.