وڭتۇستىك كورەيا پرەزيدەنتى لي چجە مەن ۋكراينا پرەزيدەنتى ۆلاديمير زەلەنسكيدى ەكى سولتۇستىككورەيالىق تۇتقىندى تاپسىرۋ تۋرالى اقپاراتتى جاريا ەتكەنى ءۇشىن قاتىگەزدىك پەن جاۋاپسىزدىقتا ايىپتادى، دەپ حابارلايدى infohub.kz سايتى.
Yonhap اگەنتتىگىنىڭ مالىمەتىنشە، سىنعا نيۋ-يوركتەگى بۇۇ باس اسسامبلەياسىندا سويلەگەن ۆلاديمير زەلەنسكيدىڭ ءسوزى سەبەپ بولعان. وندا ول ۋكراينا جاقىندا ەكى سولتۇستىككورەيالىق ساربازدى وڭتۇستىك كورەياعا جىبەرگەنىن ايتقان. ۋكراينا پرەزيدەنتىنىڭ اكىمشىلىگى ەكى سولتۇستىككورەيالىق تۇتقىندى تاپسىرۋ سەۋلمەن تىكەلەي ديالوگ اياسىندا جۇزەگە اسقانىن راستادى.
لي چجە مەن بۇل ماسەلەنىڭ اسا نازىك ەكەنىن جانە ديپلوماتياعا، ۇلتتىق قاۋىپسىزدىككە، سونداي-اق كورەي تۇبەگىندەگى قاۋىپسىزدىك جاعدايىنا وراسان زور اسەر ەتۋى مۇمكىن ەكەنىن اتاپ ءوتتى.
«ۋكراينا اقپاراتتى جاريالاماۋ تۋرالى كەلىسىمدى بۇزىپ، مالىمەتتى جاريا ەتتى. اقپاراتتىڭ جاريا ەتىلۋ سەبەپتەرىن بىلمەيمىن، ءبىراق بۇعان وكىنەمىن»، — دەدى وڭتۇستىك كورەيا پرەزيدەنتى.
ونىڭ ايتۋىنشا، سەۋل مەن كييەۆ سولتۇستىككورەيالىق ساربازداردى قۇپيا تۇردە تاپسىرۋعا كەلىسكەن. سەبەبى اقپارات جاريا بولعان جاعدايدا كوپتەگەن قيىندىق تۋىنداۋى مۇمكىن ەدى.
سونىمەن قاتار وڭتۇستىك كورەيانىڭ وپپوزيسيالىق پارتيالارى بۇل كەلىسىمدى قۇپيا ۇستاۋ شەشىمىن سىنادى. لي چجە مەن ءوز كەزەگىندە وسىنداي نازىك كەلىسىمنىڭ ەگجەي-تەگجەيىن جاريا ەتۋ قاتىگەزدىك پەن جاۋاپسىزدىق بولار ەدى دەپ جاۋاپ بەردى.
ەسكە سالايىق، 2025 جىلدىڭ قاڭتارىندا ەكى سولتۇستىككورەيالىق سارباز رەسەيدىڭ كۋرسك وبلىسىندا ۋكراين كۇشتەرىنىڭ قولىنا تۇسكەنى بەلگىلى بولعان.