وڭتۇستىك افريكا رەسپۋبليكاسىندا بىرنەشە ساعات ارالىعىندا بولعان ەكى جاپپاي اتىس سالدارىنان 27 ادام قازا تاپتى. بۇل — ەلدەگى سوڭعى كەزدەگى اتىس قارۋىنان بولاتىن زورلىق-زومبىلىقتىڭ تاعى ءبىر لەگى، دەپ حابارلايدى infohub.kz سايتى.
سەنبى كۇنى كەشكە يوحاننەسبۋرگكە جاقىن ورنالاسقان بارعا سەگىز قارۋلى ادام باسىپ كىرگەندە 17 ادام قازا تاۋىپ، تاعى 15 ادام جاراقات الدى.
جەكسەنبىگە قاراعان تۇندە كەيپتاۋن ماڭىنداعى كەنتتەگى ويىن-ساۋىق ورنىنىڭ سىرتىندا بولعان بولەك اتىستا 10 ادام قازا تاۋىپ، تاعى 11 ادام جاراقاتتاندى.
وڭتۇستىك افريكا رەسپۋبليكاسى الەمدەگى ءولتىرىلۋ دەڭگەيى ەڭ جوعارى ەلدەردىڭ ءبىرى سانالادى. سوڭعى جىلدارى وندا باندالارعا قاتىستى اتىس قارۋىنان بولاتىن زورلىق-زومبىلىقتى تەجەۋ قيىنعا سوعىپ وتىر. پوليسيا سوڭعى ەكى شابۋىلدىڭ دا سەبەبىن ناقتىلاعان جوق.
يوحاننەسبۋرگتە قارۋلى ادامدار باردىڭ سىرتىنداعى تۇتىنۋشىلارعا وق جاۋدىرىپ، سودان كەيىن ىشىندە شابۋىلدى جالعاستىردى ءارى ەكى كولىكتى ورتەپ، قاشىپ كەتتى.
پوليسيانىڭ مالىمدەۋىنشە، ون ءۇش ەر ادام مەن ءتورت ايەل قازا تاپقان، ال شابۋىلدىڭ سەبەبى ازىرگە بەلگىسىز.
كەيپتاۋندا بەس قۇربان وقيعا ورنىندا كوز جۇمسا، تاعى بەس ادام اۋرۋحانادا قايتىس بولدى.
جەكسەنبى كۇنى تاڭەرتەڭ ەكى ءىس بويىنشا دا ەشكىم ۇستالماعان.
بۇل ەكى جاپپاي اتىس دۋربان قالاسىنداعى كۆاماحۋتا كەنتىندەگى ۇيگە قارۋلى ادامدار باسىپ كىرىپ، 11 ادام قازا تاپقاننان كەيىن بىرنەشە كۇن وتپەي ورىن الدى.