وڭتۇستىك كورەيادا جۇڭگو كوشباسشىسى سي ءسزينپيننىڭ ەسىمىمەن اتالعان مەيرامحانانى ءبىر توپ جۇڭگو ازاماتى قيراتىپ، وقيعا ورنىنان دەرەۋ ءوز ەلدەرىنە قاشىپ كەتتى. بۇل تۋرالى پوليسيا مالىمدەدى، دەپ جازادى infohub.kz سايتى.
سەۋلدىڭ وڭتۇستىگىندەگى سوننام قالاسىندا ورنالاسقان مەيرامحانانىڭ بەينەباقىلاۋ جازباسىندا 24 قىركۇيەككە قاراعان ءتۇنى بەتپەردە كيگەن ءتورت ەر ادامنىڭ عيماراتقا باسىپ كىرىپ، جيھازدى قيراتىپ، لاك شاشىپ كەتكەنى كورىنەدى.
مەيرامحانا يەسى جەرگىلىكتى بۇقارالىق اقپارات قۇرالدارىنا نىسانعا سي سزينپين ەسىمىن «وڭتۇستىك كورەياداعى ەڭ ۇزدىك جۇڭگو مەيرامحاناسى بولعانىن قالاعاندىقتان» تاڭداعانىن ايتتى. ول سونداي-اق «مۇندا ەشقانداي ساياسي نيەت بولماعان» دەپ قوستى.
The Chosun Daily باسىلىمىنىڭ مالىمەتىنشە، مەيرامحانا سەگىز جىلدان بەرى جۇمىس ىستەپ كەلەدى، الايدا اتاۋىن وزگەرتۋ تۋرالى تالاپتار سوڭعى ءبىر جىلدا عانا تۇسە باستاعان.
يەسىنىڭ ايتۋىنشا، وتكەن جىلدىڭ تامىزىندا سي ءسزينپيننىڭ وڭتۇستىك كورەيادا وتەتىن ازيا-تىنىق مۇحيتى ەكونوميكالىق ىنتىماقتاستىعى سامميتىنە قاتىساتىنى تۋرالى جاڭالىق شىققان كەزدە، وعان وسى تالاپتارعا قاتىستى ونداعان قوڭىراۋ كەلگەن. كەيبىرەۋلەر ءتىپتى اقشا دا ۇسىنعان.
«قىتايدا بيزنەس جۇرگىزەمىز دەگەن ادامدار اتاۋىمىزدى وزگەرتسەك، ۇلكەن سوما ۇسىندى. ولار قايسارلىق تانىتتى»، — دەدى ول The Chosun Daily باسىلىمىنا.
اعىمداعى جىلدىڭ ساۋىرىندە بىرەۋ مەيرامحانا مازىرىندەگى «سي سزينپين ارنايى كۇرىشى» دەپ اتالاتىن تاعامعا قاتىستى وڭتۇستىك كورەيانىڭ زياتكەرلىك مەنشىك مينيسترلىگىنە شاعىم تۇسىرگەن، الايدا مينيسترلىك ەشقانداي كەمشىلىك تاپپاي، ءىستى جاپقان.
مەيرامحانا يەسى وتكەن اپتاداعى شابۋىلدى سوڭعى ءبىر جىلداعى ەڭ اۋقىمدى وقيعا دەپ اتاپ، جەرگىلىكتى بۇقارالىق اقپارات قۇرالدارىنا كەلتىرىلگەن ماتەريالدىق شىعىن شامامەن 15 ميلليون ۆوندى (11 100 دوللار؛ 8 400 فۋنت) قۇراعانىن ايتتى.
شابۋىلدان كەيىن سي سزينپين مەيرامحاناسى بەس كۇن جابىلىپ، سەيسەنبىدە قايتا اشىلدى. يەسىنىڭ سوزىنشە، ونىڭ كومانداسى ءقازىر مەيرامحاناعا جاڭا اتاۋ ىزدەستىرىپ جاتىر.
پوليسيا سەيسەنبىدە ءتورت كۇدىكتىنىڭ جاسى 20 مەن 40 ارالىعىنداعى قىتايلىق ەر ادامدار ەكەنىن مالىمدەدى. شابۋىلدان كەيىن ولار شانحاي مەن قىتايدىڭ شاندۋن پروۆينسياسىنداعى يانتاي قالاسىنا قاشقان دەپ بولجانادى.
پوليسيا ءتورت ەر ادامعا قاتىستى ينتەرپولدان « قىزىل حابارلاما» سۇراۋدى جوسپارلاپ وتىر. بۇل — قاماۋعا الۋ وردەرى ەمەس، الەمنىڭ تۇكپىر-تۇكپىرىندەگى پوليسياعا ەكستراديسيا كۇتىلەتىن ادامدى ۇستاۋعا قاتىستى سۇراۋ.
جەلىدە تاراعان سكرينشوتتارعا قاراعاندا، سي سزينپين مەيرامحاناسىندا جۇڭگو اسحاناسىنىڭ ءتۇرلى تاعامدارى ۇسىنىلادى، الايدا مازىردە بىرنەشە وڭتۇستىككورەيالىق تاعام دا بار. Google شولۋشىلارى وعان بەس جۇلدىزدىڭ تورتەۋىن قويىپ، ورتاشا باعا بەرگەن.