وڭتۇستىك كورەيا قازاقستان ازاماتتارىنا ەڭبەك كۆوتاسىن 2028 جىلدان باستاپ بەرە باستايدى، ال قازاقستاندىقتاردىڭ بۇل ەلدە زاڭدى جۇمىسقا ورنالاسۋى ءۇشىن ءوتىنىم قابىلداۋ 2018 جىلدان باستالادى. وعان دەيىن رەسپۋبليكادا جۇمىسقا ورنالاسۋعا رۇقسات بەرۋ جۇيەسىنىڭ (Employment Permit System، EPS) ارنايى ورتالىعى اشىلىپ، تەستىلەۋ جۇيەسى ىسكە قوسىلادى جانە ۇمىتكەرلەردى شەتەلگە شىعار الدىنداعى دايىندىق ۇيىمداستىرىلادى، دەپ حابارلايدى infohub.kz سايتى.
قازاقستان پرەزيدەنتى قاسىم-جومارت توقاەۆتىڭ كورەياعا ساپارى بارىسىندا تاراپتار قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگى مەن كورەيا رەسپۋبليكاسىنىڭ جۇمىسپەن قامتۋ جانە ەڭبەك مينيسترلىگى اراسىندا جۇمىسقا ورنالاسۋعا رۇقسات بەرۋ جۇيەسى (Employment Permit System، EPS) اياسىندا جۇمىسشىلاردى جىبەرۋ جانە قابىلداۋ تۋرالى ءوزارا تۇسىنىستىك مەموراندۋمىنا قول قويدى.
رەسمي جۇمىسقا ورنالاستىرۋدى ەكى ەلدىڭ مەملەكەتتىك ورگاندارى تىكەلەي ەڭبەك شارتى بويىنشا راسىمدەيدى.
EPS اياسىندا قازاقستاندىقتارعا ءۇش جىلعا دەيىنگى مەرزىمگە E-9 ۆيزاسى بەرىلەدى، ونى ءتورت جىل ون ايعا دەيىن ۇزارتۋعا بولادى. جۇمىسقا ورنالاسۋ بەس نەگىزگى باعىت بويىنشا قاراستىرىلعان: ءوندىرىس، قۇرىلىس، اۋىل شارۋاشىلىعى جانە مال شارۋاشىلىعى، بالىق اۋلاۋ، سونداي-اق قىزمەت كورسەتۋ سالاسى.
«جۇيەنىڭ اعىمداعى جىلعا ارنالعان جالپى كۆوتاسى 80 مىڭ شەتەلدىك جۇمىسشىنى قۇرايدى»، — دەپ ناقتىلادى ەڭبەك جانە حالىقتى الەۋمەتتىك قورعاۋ مينيسترلىگىندە.
الايدا قازاقستانعا ارنالعان كۆوتانى باعدارلاما تولىق ىسكە قوسىلعاننان كەيىن كورەي تاراپى ايقىندايدى.
بۇعان دەيىن «كۋرسيۆ» 40 جاستان اسقان قازاقستاندىقتاردىڭ وڭتۇستىك كورەيادا زاڭدى تۇردە جۇمىسقا ورنالاسا المايتىنىن جازعان بولاتىن.