وڭتۇستىك كورەيانىڭ شەتەلدىك ينفراقۇرىلىم جانە قالالىق دامۋ كورپوراسياسى KIND قازاقستاننىڭ وڭىرلىك اۋەجايلارىن سالۋعا جانە جاڭارتۋعا تارتىلۋى مۇمكىن. وسى مۇمكىندىكتى قازاقستان پرەزيدەنتى قاسىم-جومارت توقايەۆ پەن KIND پرەزيدەنتى ءارى باس ديرەكتورى كيم بوك حۆان تالقىلادى، دەپ حابارلايدى infohub.kz سايتى.
مەملەكەت باسشىسى كورەي كورپوراسياسىنا رەسپۋبليكانىڭ الەۋمەتتىك جانە كولىك ينفراقۇرىلىمىن جاڭارتۋعا ارنالعان اۋقىمدى جوسپاردى جۇزەگە اسىرۋعا قاتىسۋدى ۇسىندى.
تاراپتار كولىك-لوگيستيكالىق جۇيەگە ەرەكشە نازار اۋداردى. وڭىرلىك اۋەجايلاردى سالۋ مەن جاڭارتۋدان بولەك، KINDء-نىڭ اقتاۋ جانە قۇرىق پورتتارىن دامىتۋعا قاتىسۋ مۇمكىندىگى ءسوز بولدى.
كيم بوك حۆان ءوز كەزەگىندە قازاقستاندى ەۋرازيانىڭ نەگىزگى كولىك-لوگيستيكالىق تورابى دەپ اتاپ، ەكى مەملەكەتتىڭ ەكونوميكالىق ىنتىماقتاستىعىن نىعايتۋعا جاردەمدەسۋگە دايىن ەكەنىن مالىمدەدى.
KINDء-نىڭ قازاقستانداعى ءىرى ينفراقۇرىلىمدىق جوباعا قاتىسۋ تاجىريبەسى بار: كورپوراسيا ۇلكەن الماتى اينالما اۆتوموبيل جولىن (ءۇاااج) جۇزەگە اسىرۋعا تارتىلعان بولاتىن.
ىنتىماقتاستىقتىڭ تاعى ءبىر ىقتيمال باعىتى Alatau City بولۋى مۇمكىن. كەلىسسوزدەر بارىسىندا نەگىزگى نازار KINDء-نىڭ جاڭا قالانى دامىتۋعا قاتىسۋ پەرسپەكتيۆالارىنا اۋدارىلدى. توقايەۆ جوبانىڭ الەۋەتىن اتاپ، كورەي تاراپىنىڭ Alatau City ينفراقۇرىلىمدىق جانە ينۆەستيسيالىق باستامالارىنا بەلسەندى قاتىسۋىنا ءۇمىت ءبىلدىردى.
بۇعان دەيىن «بايتەرەك» حولدينگى KIND-مەن ىقتيمال ىنتىماقتاستىقتىڭ باسىم باعىتتارى رەتىندە كولىك جانە سيفرلىق ينفراقۇرىلىم، لوگيستيكا، قالالىق دامۋ جانە جاڭارتىلاتىن ەنەرگەتيكا قاراستىرىلىپ جاتقانىن حابارلاعان.
توقايەۆ پەن كيم بوك حۆان بىرلەسكەن قازاق-كورەي ينۆەستيسيالىق قورىن قۇرۋدى دا تالقىلادى. ول قازاقستاننىڭ ينفراقۇرىلىمدىق جانە ەنەرگەتيكالىق جوبالارىنا كورەي كاپيتالى مەن تەحنولوگيالارىن تارتۋ تەتىگىنە اينالماق.
بۇعان دەيىن «بايتەرەك» وسىنداي قوردىڭ ءبىرىنشى كەزەڭدەگى كولەمى KIND مەن Qazaqstan Investment Corporation تەڭ قاتىسۋىمەن 200 ميلليون دوللاردى قۇراۋى مۇمكىن ەكەنىن حابارلاعان. كەيىن ونىڭ مولشەرى 1 ميلليارد دوللارعا دەيىن ۇلعايۋى مۇمكىن.
كورەي تاراپىنا جالپى قۇنى شامامەن 7 ميلليارد دوللار بولاتىن الەۋەتتى قازاقستاندىق جوبالار پورتفەلى دە تانىستىرىلدى.