وڭتۇستىك كورەيانىڭ بىرىگۋ ىستەرى جونىندەگى ءمينيسترى چون دون ەن دەميليتاريزاسيالانعان ايماقتا بولعان مينا جارىلىسىنان كەيىن كحدر-عا كەلىسسوز جۇرگىزۋدى ۇسىندى، دەپ حابارلايدى infohub.kz سايتى.
The Korea Times دەرەگىنشە، وڭتۇستىك كورەيا ۆەدومستۆوسىنىڭ باسشىسى پحەنيانعا اسكەري دەماركاسيالىق شەكارا ماسەلەسى بويىنشا ءوزارا تۇسىنىستىكتى نىعايتۋ ماقساتىندا كەلىسسوز جۇرگىزۋدى ۇسىندى.
«مەن بىرىگۋ ءمينيسترى رەتىندە سولتۇستىككە ۇسىنىس جاسايمىن: ءبىز ءقازىر كەزدەسىپ، سويلەسۋىمىز كەرەك. ءبىز كەمىندە قارىم-قاتىناستى باستاپ، شەكارا سىزىعىن تەكسەرىپ، ونى قايتا زەرتتەۋىمىز قاجەت»، — دەدى چون دون ەن جۋرناليستەرگە.
«ينتەرفاكس» دەرەگىنشە، وسى اپتانىڭ باسىندا وڭتۇستىك كورەيا كحدر-دان كەشىرىم سۇراۋدى جانە سەۋلدىڭ پىكىرىنشە، دەميليتاريزاسيالانعان ايماقتا بولعان سولتۇستىككورەيالىق مينالاردىڭ جارىلىسىنا بايلانىستى شارا قولدانۋدى تالاپ ەتتى. 21 قىركۇيەكتەگى وقيعا سالدارىنان ءۇش وڭتۇستىككورەيالىق اسكەري قىزمەتشى زارداپ شەكتى.
سول ۋاقىتتا سولتۇستىك كورەيا كوشباسشىسىنىڭ قارىنداسى، كورەيا ەڭبەك پارتياسى وك ءبولىمىنىڭ مەڭگەرۋشىسى كيم ە چجون پحەنياننىڭ بولعان جارىلىسقا قاتىسى جوق ەكەنىن مالىمدەپ، سەۋلدىڭ ايىپتاۋلارىن «كەزەكتى پروۆوكاسيا» دەپ اتادى.